CEBU, Philippines - Gipangandaman na sa kadagkoan sa Department of Education (DepEd) sa division sa dakbayan sa Mandaue ang pagbukas sa klase sa Hunyo 3, niining tuiga pinaagi sa pagpalambo sa kahimtang sa mga tulunghaan nga kanunay nga bahaan sa panahon nga mokusog ang ulan.
Si Benjamin Tiongson nga maoy administrative officer sa DepEd sa maong dakbayan miingon nga mokabat sa 49 ka mga publikong tulunghaan ang ilang giandam alang sa pagbukas sa klase sa motunghang kabataan karong Hunyo. Ang pag-andam niini ilang gihimo pinaagi sa gipasiugdahan nga Brigada Eskuwela nga gisalmotan sa mga ginikanan, mga tinun-an, sector relihiyuso , mga magpapatigayon ug uban pa.
Matud pa ni Tiongson nga dili lang ang pag-ayo sa mga naguba nga lingkoranan ug mga lawak saringan ang ilang gihimo kun dili nalakip na usab niini ang paglimpiyo sa mga kanal aron malikayan ang lunop sa panahon sa tinguwan. Giangkon niya nga sa 49 ka mga publikong tulunghaan sa dakbayan adunay tulo niini nga kanunay nga bahaan sama sa eskuylahan sa Guizo Elementary School sa barangay Guizo, Basak Elementary School sa barangay Basak ug Tipolo National High School sa barangay Tipolo.
Si Tiongson midugang nga ilang gisemento karon ang ground floor sa maong mga tulunghaan ug ilang giabunohan ang nalupa nga bahin niini aron dili lapawan sa tubig kun mag-ulan.
Hinuon matud niya nga kun bahaan gyud, ang mga estudyante niini pasaw-on na lang nila og lawak didto sa Mandaue City Central School. (BANAT NEWS)