CEBU, Philippines - Dugang 100 ka mga scholar ang gastohan sa kagamhanan sa dakbayan sa Naga aron makalampos sa ilang kurso nga libre niining tuiga.
Si Mayor Valdemar Chiong mibutyag sa Banat News nga matag tuig mopatungha ang kagamhanan sa Naga og tagsa ka gatos ka mga scholar.
Miingon si Chiong nga gigahinan gayud niya kini og pundong salapi aron ang mga kabus nga mga estudyante makalampos gayud sa kurso nga ilang gitinguha.
Gani miingon si Chiong nga alang sa mga estudyante nga maayo og performance sa eskuylahan gidasig niya nga planohon niini ang kurso nga mosakar sa iyang abilidad aron dili mausik ang gasto sa goberno.
Sa formal briefing nga gipahigayon didto sa Enan Chiong Activity Center, giawhag ni Chiong ang mga scholar sa siyudad nga maningkamot gyud sa ilang kaugalingon kay sila ra ang mabulahan pag-abot sa adlaw.
Labing gipahinum-duman ni Chiong ang maong mga scholar nga dili una mosulod sa uyab-uyab kay mao kanay makayabag sa usa ka estudyante.
Ang kagamhanan sa Naga mogahin og P4 milyones matag tuig alang sa 100 ka scholar ug ang estudyante na maoy papilion sa kurso nga kuhaon niini.
Hinuon kinahanglang matuman nila ang kondisyon nga kinahanglang ma-maintain nila ang grado nga di moubos sa 2.5 aron dili matangtang gikan sa pagka-scholar.
Aron masiguro sa siyudad nga gamiton gyud sa usa ka estudyante sa pagtungha ang budget nga gigahin alang kanila, usa ka kasabotan ang gipirmahan tali ni Chiong ug sa mga kadagkoan sa tulunghaan diin motungha ang scholar sama sa Professional Academy of the Philippines nga anaa ra mahimutang sa dakbayan sa Naga. (BANAT NEWS)