34 ka aplikante’g trabaho nadawat

CEBU, Philippines - Mokabat sa 34 ka mga aplikante og trabaho alang sa gawas sa nasud ang  nadawat   sa  mga  recruiter   human  sila interviewha  atol sa  job fair nga gipasiugdahan sa kagamhanan sa dakbayan sa Mandaue   sa miaging  adlaw.

Katambayayong  usab  sa lokal nga  kagamhanan  sa maong  dakbayan  ang  Department of Labor (DOLE), Jaycees International Zugbuana ug Benedicto College  sa maong kalihokan  nga gitumong  aron  makabaton  og  maayong  panginabuhi  ang  mga walay  trabaho. 

Si Musoline Sulova nga maoy pangulo sa Public Employment and Service Office (PESO) sa maong dakbayan  miingon nga aduna  pay laing  100   ka  mga aplikante  nga may purohang  madawat   kun  mopasar  sila  sa  final examination sa sunod semana.

Dugang pa niya nga mokabat sa 400 ka mga job applicant ang nagparehistro sa nahisgotang job fair nga ilang gipahigayon sa sulod sa gymnasium sa Benedicto College nga nahimutang  sa dalan A.S. Fortuna sa maong dakbayan.

Milaom si  Suliva nga ang  maong  job fair makatabang  sa pagpakunhod  sa  gidaghanon sa  mga  molupyo  sa  dakbayan sa Mandaue  nga  walay  trabaho.  (BANAT NEWS)