CEBU, Philippines - Usa ka lalaki ang gidunggab patay sa iyang silingan tungod sa pasangil nga gilugos niini ang asawa sa suspek didto sa usa ka sitio sa bukirong barangay sa dakbayan sa Sugbo alas 9:30 sa gabii sa miaging adlaw.
Ang namatay giila nga si Giovanni Son Soquib, 40, usa ka job order employee sa siyudad sa Sugbu. Ang suspek usa ka 28-anyos (pangalan gipugngan sa Banat News aron proteksyonan ang asawa ug mga anak niini) usa ka landscaper ug bana sa giingong gilugos sa biktima.
Matud ni Joel, igsuon sa biktima nga iya na lang nakit-an gawas sa ilang pinuy-anan nga naglubog na sa kaugalingong dugo si Soquib nga may samad dinunggaban sa iyang dughan,walang bahin sa liog ug ulo apan nakasulti pa kini kinsay midunggab kaniya.
Gidala pa nila ang biktima sa Don Vicente Sotto Medical Center apan gideklarar kining patay. Boluntaryo hinuong mitahan kang PO3 Elver Mabatid sa Mountain Barangay Police outpost ang suspek.
Sa pakighinabi sa Banat News sa suspek mibutyag kini nga iyang nabuhat ang maong krimen tungod sa wa na niya kapugngi ang iyang kasuko dihang nasayran niya nga gilugos ni Soquib ang iyang asawa diha mismo sa ilang balay.
Sa pakighinabi sa Banat News sa 26-anyos nga asawa sa suspek kini naghilak nga mibutyag nga wa niya dayon gisumbong sa iyang bana ang nahitabo kaniya tungod sa iyang kahadlok kung unsay buhaton niini ngadto sa biktima.
Ang ginang miingon nga ang unang paglugos nahitabo niadtong bulan Enero ning tuiga ug nasundan niini lang bulana (Mayo).
Matud niya nga misuway siya pagsukol apan gitiunan siya og kutsilyo ug gihulga siya nga lubaon. Nakuptan usab sa suspek ang tubo nga iya untang ipuspos.
Apan ang kapolisan mopahigayon pa og imbestigasyon kabahin sa alegasyon sa magtiayon batok sa biktima tungod kay nagpadayon pa ang imbestigasyon sa maong kaso. (BANAT NEWS)