CEBU, Philippines - Ang tinguha ni Congresswoman-elect Aileen Radaza nga paghimong lalawigan sa dakbayan sa Lapulapu dako og ikatabang alang sa paspas nga paglambo sa kabarangayan sa mainland ug ingon man sa kabarangayan sa isla sa Olango. Si Mayor Adelino Sitoy sa lungsod sa Cordova nga nahinabi sa mga tigbalita mipadayag nga andam magpasakop ang ilang lungsod sa gilaraw nga katukoran sa bag-ong probinsiya kay positibo ang iyang panglantaw niini.
Hinuon ang negosyante nga si Efrain Pelaez Jr., misupak sa maong plano kay alang kaniya usa kini ka matang sa “Sugbuak†ug pagbahinbahin sa lalawigan sa Sugbo. Sumala sa gipahayag sayo ni Congresswoman-elect Radaza, nga inigtambong niya sa sesyon sa kongreso iyang iduso ang maong balaodnon sa pagtukod og probinsiya sa Mactan .
Gipasabot niya nga uban s a maong sugyot, ilakip niya ang pagtukod og lungsod nga tawgong lungsod sa Opon nga pagalangkoban sa barangay sa Maribago, barangay Agus, barangay Marigondon, barangay Mactan, barangay Pajac ug mga sikbit pa nga barangay niini.
Mahimo na usab nga lungsod ang isla sa Olango nga gilangkoban sa 11 ka barangay ug ang barangay Poblacion, sa Lapulapu ug mga sikbit nga barangay niini, sa gihapon magpabiling dakbayan ug maoy magsilbing capital city sa lalawigan sa Mactan.
Si Mayor Paz Radaza nga inahan ni Congresswoman-elect Radaza nga nahinabi sa Banat News miingon usab nga kun kaaprobahan sa mga magbabalaod, isumiter dayon kini sa katawhan aron pasawhan pinaagi sa referendum alang sa pagtubag sa pangutana, nga uyon ba sila o dili nga mahimong probinsya ang Mactan. (BANAT NEWS)