Mga winner giawhag paglimpyo sa ilang basura

CEBU, Philippines - Ang Department of Environment and Natural Resources (DENR-7) miaghat sa mga mananaog sa miaging eleksyon ning tuiga sa pagpanglimpyo sa mga campaign materials sama sa poster ug tarpaulin sa mga kadalanan ug lakip na usab niadtong anaa mahimutang sa sulod sa tunghaan.

Matud pa ni DENR 7 Regional Executive Director Isabelo Montejo nga ilang gitawag ang atensyon sa mga hingtungdan  nga hatagan  nila  og    pagtagad ang kalikopan pinaagi sa pagpangolekta sa mga hugaw nga nagkatag sa miaging botasyon lakip na kadtong sa ilang mga kaatbang.

Kini  tungod  kay  matud  pa  ni  Montejo  nga kun pasagdan  kini  madugay  mahimo  kining basura sa kadalanan  ug  kun  dili  kini  mahipos  dayon makabara  kini  sa  mga  imbornal  ug kanal ug  mosangpot  ngadto  sa mga lunop  sa  kadalananan sa panahon   nga tinguwan.

Subay sa Republic Act No. 9003 o ang gitawag nga Ecological Solid Waste Management Act of 2000  nga  kining  maong  balaod  maoy naghatag  og tukmang  sistema sa  pagpatuman  sa solid waste management nga programa sa nasud aron  maproteksyonan ang kahimsog sa panglawas sa publiko ug usab sa kalikopan.

Midugang  siya  nga ang maong balaod nagpatuman  usab  sa pagbahig  sa malata  ug  di malata  nga basura ug  nagtukod sa  Materials Recovery Facility (MRF) sa mga Local Government Units (LGUs).

Nagdili usab sa pagsunog sa mga basura , ug uban pang  mga  sagbot . 

Giklaro ni Montejo nga ang implementasyon sa R.A. 9003 usa ka nag-unang responsibilidad sa mga LGU.

Ubos sa maong balaod ang barangay unit maoy responsabli sa  pagbahig  sa malata  ug  di malata, samtang ang mga city ug municipal government maoy mangolekta sa mga dili na mapuslan nga mga basura.

Gibutyag ni Montejo nga ang pag-atiman sa kalikopan dili lamang responsibilidad sa goberno kundi lakip na sa mga Filipino kinsa nagpakabana  sa pagtuman  sa iyang katungdanan sa pagproteher sa kalikopan. (/WC)(BANAT NEWS)