Mamaligyaa’ag sigarilyo naigo sa saag nga bala

CEBU, Philippines - Naangol  ang usa ka mamaligyaay og sigarilyo   dihang nasabak  kini  sa  usa ka  saag nga bala didto  sa Sitio Mahayahay, A. Lopez, Brgy. Calamba ning dakbayan sa Sugbo  sa miaging   gabii.

 Ang biktima giila  sa kapolisan   nga si Jorge Morre, 33,  nga  molupyo sa nahisgutang lugar, samtang ang responsable sa  pagpabuto  og  armas kansang  bala  miigo  sa biktima  wala  hiilhi.

Sa imbestigasyon sa kapolisan ngadto kang Morre nasuta nga ang biktima naglingkod-lingkod sa gawas  sa  ilang  balay   dihang kalit siyang nakabati og boto sa pusil duol sa maong dapit.

Unya  mao  na lay  namatngonan  sa biktima  nga mibanhod  ang  iyang  tuo  nga  tiil  dayon  nalipong  siya  ug  naluya  dayon  natumba  sa yuta.

Ang  biktima gihatud  dayon  sa  iyang  mga  kabanay  ngadto   sa Cebu City Medical Center.

Si PO1 Reoful Adalim sa Homicide Section,  sa Cebu City  Police  Office  nagkanayon  nga usa  ka saag nga bala ang miigo sa biktima .

Kini  tungod  kay  nasuta  nila  nga  wala  kini  kontra  sa  ilang  lugar.

Hinuon  tungod  dili man  dako  ang  samad, wala  nay  plano  ang  biktima  nga  sutaon    kinsay  nagpabuto sa  ilang  lugar  kansang  bala  mitaroy  sa iyang  tiil. (BANAT NEWS)