CEBU, Philippines - Namatay ang usa ka senior citizen nga babaye human kini dasmagi og motorsiklo didto sa F. Paras Street, sa Barangay Poblacion, lungsod sa Barili sa miaging gabii.
Ang biktima giila nga si Carmelita Manto, 65, molupyo sa maong dapit, samtang drayber sa motor nga midasmag kaniya giila nga si Marian Rey Aguilar, 28, taga Sitio Kalapukan, Brgy. Sta Ana, sa maong lungsod.
Sa imbestigasyon ni SPO2 Marcelo Quevedo Jr. sa Barili Police Station nasuta nga kusog nga nagpadagan si Aguilar sa iyang motorsiklo sa maong higayon.
Dihang pag-abot niya sa maong lugar mao usay paglabang sa karsada sa biktima nga kuyog sa iyang bana ug gumikan sa kakusog sa dagan sa motor, wala na kini mapiog sa drayber aron unta kalikayan ang biktima.
Ang biktima nga milagubo sa karsada kansang ulo maayong pagkapantok gisakwat dayon sa bana ug gihatud ngadto sa Barili District Hospital apan gideklarar kining patay na sa paghiabot didto.
Ang suspetsadong drayber kinsa nalukapa usab sa yuta human mosaliring ang iyang motor nakabaton usab og samad sa nawong.
Dihang giimbistigar sa kapolisan nasuta nga ang suspek walay lisensya nga nag-drive sa motor niadtong higayona. (BANAT NEWS)