CEBU, Philippines - Gumikan sa kahingawa sa iyang apo nga napriso gumikan sa paggamit sa gidiling drugas, usa ka retiradong maestro nagpusil patay sa iyang kaugalingon sulod sa ilang balay sa barangay 8, lungsod sa Tuburan niadtong Sabado sa alas 8:00 sa buntag.
Giila ni PO3 Junyl Aper, police investigator sa Tuburan Police Station ang naghikog nga si Rolando “Lindy†Tabotabo, 75, minyo, molupyo sa maong lugar ug kanhi maestro sa Tuburan National High School nga karon mao ang Cebu Technological University (CTU) Tuburan Campus. Si PO3 Aper mibutyag sa Banat News nga nasuta niya sa iyang pag-imbistigar kang Tina Marie Maxilom, 50, anak ni Tabotabo nga nag-estorya pa sila ug ang amahan niini sa wala pa kini magluthang sa iyang kaugalingon.
Matud pa ni Aper nga misulti si Tabotabo ngadto kang Tina nga gusto niining ibaligya ang ilang yuta sa Mt. View nga anaa sa palibot sa ilang gipuy-an aron ikapiyansa niini ang halin sa iyang apo nga si Ronald Tabotabo kinsa napriso sa Cebu Provincial Detention and Rehabilitation Center (CPDRC) gumikan sa paggamit og gidiling drugas.
Apan giingnan kuno ni Tina ang iyang amahan nga ikonsulta una nila sa uban niyang igsoon nga tua sa Canada una ibaligya ang maong yuta.
Apan mao ra kuno kadto ang nahiubsan ni Tabotabo dayong lanit sa armas de fuego niini ug gidul-it sa iyang suwang uban sa pag-ingon nga “unsa di mo mosugot nga ibaligya ang yuta kay maghikog koâ€.
Si Tina nga wala magdahum nga pabuthon sa iyang amahan ang armas niini dali nga mipakalma niini apan wala na niya kini kapugngi kay gikablit gyud ang gatilyo ug sa pagbuto deretso kini og kalup-og sa ilang sawog.
Dali nga nakasinggit og tabang sa iyang mga silingan si Tina ug ilang gihatud ang iyang amahan ngadto sa Tuburan District Hospital diin kini gideklarar nga patay na sa pag-abot didto.
Napunitan sa kapolisan nga miimbistigar sa maong hitabo ang .38 kalibre nga revolver nga may unom ka buhing bala nga gituohang maoy gigamit ni Tabotabo sa paghikog, apan wala nila hikit-i ang kabhang sa bala niini ug wala usab nila hisayri kun diin gikan ang maong armas.
Matud pa ni Aper nga wala silay nakitang foul play sa kamatayon ni Tabotabo.
Nasayran nga ang pamilyang Tabotabo inila kaayo sa Tuburan ug gani usa sa mga konsehal nga si Marie Tabotabo kinsa napildi sa miaging election niadtong Lunes usa ka umagad sa namatay nga Tabotabo.
Nasayran usab gikan kang Aper nga ang kasamtangang Balay Lungsod o munisipyo sa lungsod usa ka ancestral home sa mga pamilyang Tabotabo nga ilang gidonar ngadto sa kagamhanan sa lungsod. (BANAT NEWS)