CEBU, Philippines - Duha ka lalaki ang napusilan, diin usa niini namatay, samtang naangol usab ang usa sa managlahing lungsod sa habagatang bahin sa lalawigan sa Sugbo sa miaging gabii. Ang namatay mao sila si Ernesto Acusar, 27, molupyo sa barangay Panadtaran, lungsod sa San Fernando, ug ang naangol mao si Jefferson Rosales Costudio, 29, nga taga sitio Cadaatan, barangay Sumaguan, lungsod sa Argao.
Ang suspetsadong miluthang kang Acusar, mao si Merban Paradela, 30, usa ka tanod sa barangay Panadtaran, samtang wala hiilhi ang mipusil kang Costudio.
Si Sr. Insp. Gerard Ace Pelare, hepe sa kapolisan sa San Fernando Police Station nagkanayon nga samtang nagpakaon si Acusar sa iyang mga hiniktang igtatari sa kilid sa ilang balay, padayon usab silang nag-inom ug si Paradela.
Apan dihang nangalasbag na mitumaw ang lalis sa duha hangtud nga gilanit ni Paradela ang iyang armas de fuego ug giluthang ang biktima. Human mahagba sa yuta ang biktima, misirit usab pahilayo sa maong lugar si Paradela.
Ang biktima nga samdan sa dughan gihatud dayon sa mga tagtungod ngadto sa Carcar City District Hospital diin kini ideklarar nga patay sa paghiabot didto sa doktor nga miatiman niini.
Padayon pang gipangita sa kapolisan si Paradela aron kapasakaan og kiha sa krimen nga iyang nahimo.
Samtang si Costudio nagtan-aw og salida sa telebisyon sa balay sa iyang ginikanan sa barangay Gutlang, lungsod sa Argao, dihang giluthang kini sa wala hiilhing kriminal.
Sr. Insp.Allan Rosario sa Argao Police Station nagkanayon nga human masabak sa mga bala ug nahagba sa sawog ang biktima, dali usab kaayong nakadagan pahilayo sa maong lugar ang kriminal.
Gibutyag ni Insp. Rosario nga dihang gisukit niya ang biktima sulod sa tambalanan mitug-an nga wala siya kontra. Apan natahap si Insp. Rosario nga nagbakak kaniya ang biktima tungod kay dili mahitabo nga pusilon siya sulod sa balay sa iyang ginikanan kun wala pay nagdumot kaniya.
Hinuon sa pagkakaron padayon pang gipangita sa kapolisan ang maong kriminal aron masuta unsay motibo sa pagluthang angol niini sa biktima. (BANAT NEWS)