CEBU, Philippines - Hawanan sa mga sakop sa City Hall clearing team pipila ka adlaw gikan karon ang dalan Legaspi duol sa simbahang Katedral kay daghang mga tindera nga anaa na magbutang og tindahan sa karsada.
Ang maong lugar dugay na nga gireklamo sa mga tourist guide kay mauwaw sila sa mga bisita nga langyaw nga gubot kaayo ang maong dapit tungod sa mga naninda nga anaa na sa karsada.
Nabantayan nga ang tindahan tua ra sa daplin sa karsada apan ang mapahimuslanong mga tindera mipalapad sa ilang baligyaanan ngadto na sa karsada nga nakabalda na sa agianan sa mga sakyanan.
Ang dalan Legaspi ilabi na ang kilid nga bahin sa Katedral kanunay lang nga makasinati og grabeng kahuot sa mga sakyanan tungod kay dili kaayo daku ang karsada.
Ang karsada giibanan pa gayud tungod sa pagbutang og “pay-parking area†sa pikas kilid habig sa simbahan samtang ang atubangan nga bahin sa Barangay Hall sa Sto. Niño gigamit nga parking area sa mga sakyanan sa barangay ingon man sa usa ka fire truck.
Ang hepe sa Probe nga si Raquel Arce miingon nga dugay ra sila nga nagplano sa paghimo og clearing operation sa mao nga lugar apan wala nila kini himoa sa panahon sa kampanya kay aron dili madudahan nga sila namolitika.
Ang dapit nga nahimutangan sa mga tindera duol kaayo sa barangay hall sa Sto. Niño kang kansang kapitan alyado ni Kongresista Tomas R. Osmeña nga kontra ni Mayor Michael Rama.
Ang mga hingtungdang tindera miingon nga wala sila’y mahimo kun papahawaon sa maong lugar kun ang rason gitumong aron moanindot ang maong dapit. Giangkon sa mga tindera nga nakalapas na sila sa gitugot sa dakbayan nga pabaligyaan. (BANAT NEWS)