CEBU, Philippines - Gihulagway ni Regional Director Temie Lambino sa Commission on Elections (COMELEC)7 nga hapsay ug malampuson ang resulta sa eleksyon dinhi sa Sugbo bisan nalangay ang transmittal sa ubang mga boto gumikan sa depektusong Compact Flash Cards.
Matud ni Lambino atol sa press briefing kagahapon nga dako kaayo og gikatabang sa kahapsay sa eleksyon ang gipatuman nilang mga balaod sama sa liquor ban ug gun ban nga maoy sagad hinungdan sa mga kagubot.
Mapasalamaton usab kaayo sila sa kapolisan ug sa mga sundawo nga maoy katambayayong nila sa pagpatuman sa maong mga balaod. Itandi sa nakalabay nga mga piniliay, mas dali ang resulta sa eleksyon karon luyo sa kadaghan sa mga presinto nga gihimong usa, ug gani sa tibuok nasud mikabat sa 80, 000 ang katibuk-ang clustered precincts, matud pa ni Lambino.
Bisan pa man sa pagka dismaya sa ubang kandidato gumikan sa pagkalangay sa resulta sa inihapay , apan ila gyud nga gipadayon ang pagpatuman sa mga lagda ug pamaagi nga gimando sa ilang ulohang buhatan sa Manila, sumala usab ni Atty. Eddie Aba, ang Provincial Comelec Supervisor.
Sa laing bahin ipanghatag na ugma ang mga cash cards nga gikan sa Landbank nga adunay sulod nga tag P4,000, ngadto sa mga magtutudlo nga miserbisyo niadtong adlaw sa eleksyon. (BANAT NEWS)