CEBU, Philippines - Nabalda ang dagan sa trapiko sa dalan padung sa amihanang bahin sa lalawigan sa Sugbu human nanghigda sa dalan agi og pag-protesta ang mga supporters sa naparot nga si kanhi mayor Ritchie Wagas niadtong Miyerkules sa gabii.
Dunay uban nga nagdala og placards nga nanawagan sa Comelec nga ipaagi sa manual counting ang pag-ihap sa botos.
Kini maoy nakaingon nga nabara ang mga sakyanan padung sa Danao City ug Mandaue City. Si Wagas nabiyaan sa botos sa higpit niyang kaatbang nga kasamtangang mayor sa lungsod nga mao si Joel Quiño.Ang protesta gitunong atol sa final counting sa nahibiling mga botos sa mga sakop sa board of canvassers diha sa munisipyo. Diha usab ang mga supporters ni Quiño nga nakigtinubagay sa pikas kampo.
Tungod niini, si Senior Inspector Jaime Tolentino, hepe sa kapolisan sa maong lungsod, mimando sa pagbutang og barikada atubangan sa munisipyo aron di malawgaw ang canvassing.
Si Election Officer Patricia Sitoy mipasabot nga dili sila makabuot aron ipaagi sa manual counting. Ang abogado ni Wagas nga si Atty. Joilie Medalle misuway unta sa paghangyo kang Sitoy nga ipahunong ang proklamasyon tungod kay duna sila’y gisang-at nga manifestation nga nag-awhag og manual counting, apan gipasabot siya ni Sitoy sa guidelines sa Comelec nga mahimo nang iproklamar ang mananaog kung makita sa Board of Election Inspectors nga di na makaapektar pa sa labaw ang nahibiling basahunong botos. Bisan pa dunay mga nagprotesta sa gawas sa munisipyo naproklamar sila si Quiño ug ang iyang bise mayor nga si Josephine Abing uban sa ilang mga konsehal isip mananaog. (BANAT NEWS)