2 patay sa disgrasya sa sakyanan

CEBU, Philippines - Duha  ka  lalaki  ang  namatay  sa  mga  aksidente  sa  kadalanan  ug  sakyanan  sa managlahing  dapit  sa  lalawigan  sa miaging  adlaw.

Ang  mga  biktima  mao  sila  si Cristito Otom Jr, 59, usa  ka  tanod  sa  barangay  Panaguikan,  lungsod  sa Dalaguete  ug   Gregory Alipon, 43, minyo, nga taga  barangay  Matab-ang , dakbayan sa Toledo.

Si  Otom patay  nga  miabot  sa tambalanan  human  kini  dasmagi  sa usa  ka multicab  nga  gimaneho  ni Roberto Bontilao, 41, usa ka  mananagat  nga  taga barangay  Veto,  lungsod  sa Minglanilla.

Sumala  sa blotter  sa  kapolisan  sa lungsod  sa Dalaguete  nga  gikan  sa iyang  duty  ang  biktima,  dihang  milabang  kini  sa karsada  aron  mosakay  sa usa  ka habal-habal  nga  nagpaabot  kaniya   padung  nga  mopauli,  dihang  mao usay  pag-abot  sa nagbagiyos  nga  multicab  ni Bontilao  kinsa  giingong  lasbag  sa alak,    busa  maayong  pagkasabak    sa biktima.

Tungod  sa pagkabusdak  sa   ulo niini sa sementadong dalan nakuyapan  kini.

Gihatud  dayon  kini  ngadto sa Julio Cardinal Rosales Memorial Hospital sa Dalaguete apan  namatay  paglabay  sa  15 minutos.

Samtang ang suspetsado boluntaryong mi-surrender sa kapolisan ug gidala kini  ngadto  sa Isidro Kintanar Memorial Hospital diin  siya  napalgang  positibo  sa gipahigayong   liquor test .

Ang  suspetsado nag-atubang  sa kasong  reckless imprudence resulting to homicide ug paglapas  sa liquor ban nga gipatuman sa COMELEC atol sa piniliay.

Samtang  si Alipon  nagmaneho  sa iyang  motorsiklo  dihang  pag-abot  niini  sa kurbadang  bahin  sa karsada  didto sa  national highway   sa  Matab-ang  kalit  nga  misaliring  ang  iyang  sakyanan  ug  midasmag  sa  punoan  sa Ipil-ipil    daplin  sa karsada  ug  maayong  pagkapisok  sa iyang  ulo.

Dali  kining gihatud  sa  mga  nakasaksi  ngadto  sa  Toledo City Hospital diin  kini idiklarar   nga dead on arrival. (BANAT NEWS)