Goons nangadakpan

CEBU, Philippines - Lima ka armadong lalaki nga nagdala og sample ballots nga adunay gipasukip nga kwarta ang nadakpan diha sa barangay Bayabas sa dakbayan sa Danao.

Ang mga nasikop mao sila si Cesario Pastorite, Ronie Lumapis,Sanny Giba, Danilo Montilla at Jubert Perez kinsa nadakpan duol sa polling center sa barangay Bayabas sa maong dakbayan, matud pa ni  Supt. Reste Santos nga nahinabi sa Banat News.

Ang lima giingong nakuhaan og duha ka armas nga .38 rebolber nga adunay mga buhing bala ug sample ballots nga adunay mga lokal nga kandidato sa partidong United Nationalist Alliance (UNA) ug One Cebu.

Apan ang mga dinakpan mihimakak sa mga pasangil nga sinuholan sila og politiko.

Samtang kasohan og Comelec gun ban and RA 4136 ang ipasaka batok sa unom ka mga armadong tawo nga naaresto sa Barangay Daan Lungsod, Tuburan sa miaging gabii.

Matud pa sa Chief of Staff sa Police Regional Office Sr. Supt. Edward Carranza nga ang mga nasikop nga mga lalaki sa lungsod sa Tuburan pulos gikan sa Iloilo.

Sumala pa ni Carranza nga gawas sa armas ug drugas  nakuhaan ang unom og t-shirts sa mayoralty candidate sa One Cebu nga si Rosemarie Suezo ug vice mayoralty candidate Daphne Lagon.

Ang mga kasohan  mao sila si Hepty Relator, 50, taga Jaro; Michael Demonteverde de Castillo, 43, taga North Dumangas; Edgar Jareleza, 40, taga Rizal Palapala Zone 2; Roel Casas, 37, taga Agtabo, Passi City; Federico Acelar, 53, taga Doñas; ug Gilbert Lorca, 43, nga taga Beta, pulos taga Iloilo.

Ang mga suspek nadakpan sa checkpoint sa Regional Public Safety Battalion (RPSB) ug sa Tuburan police mga  alas 7:30 sa gabii. Nakuha gikan sa mga suspek ang usa ka Ford F150 pick up (YAG 271), tulo ka .45 pistol, duha ka KG9 caliber 9mm sub-machine gun pistol, usa ka Tanfoglio 9mm pistol, rifle grenade, duha ka hand grenades, mga bala, usa ka medium ug tulo ka gagmay nga pakete sa shabu, usa ka gamay nga pakete sa marijuana, disposable syringe, tulo ka ball caps, upat ka bonnets ug nagkalain-laing identification cards.

Sa laing bahin, nadakpan sila si Jose Navales, 66 ug Elmer Llanis, 49  kagahapon  tungod sa liquor ban diha sa Sitio Teeners Barangay Tuyan syudad sa Naga.

Nalandig sa tambalanan ang drayber ni San Fernando mayoralty candidate Lakambini Neneth Reluya nga si Antonio Kong, 61, kinsa nakaangkon og samad pinusilan sa likod kinsa gi-ambush sa barangay Balungag samtang naglibot sa mga polling areas. Ang kapolisan padayon pa sa imbestigasyon sa maong hitabo.

(Lesley Caminade-Vestil, Brenda Batuto, Darrel Carumba, Ria Mae Booc, Ray Anthony Espedido, Queenee Anne Vidal, CNU Interns/EIM) (BANAT BALITA)