CEBU, Philippines - Duha ang patay ug 17 ka tawo angol lakip na niini ang unom ka buwan nga bata sa managlahing disgrasya sa kadalanan sa lungsod sa Tabogon ug Dalaguete.
Usa ka 80-anyos nga tiguwang ang giingong giatake sa kasing-kasing dihang ang gisakyan niini nga cargo truck nadisgrasya human naguba ang brake samtang nagbiyahe sa bukirang bahin sa Barangay Tabao, Tabogon kagahapon sa buntag. Ang Mitsubishi Canter (GHY 621) matud pa adunay sakay nga sobra sa 30 ka mga pasahero paingon unta sa Tabao Elementary School aron mobotar dihang nahitabo ang aksidente. Giingong giabangan sa usa ka kandidato ang maong sakyanan.
Si Esber Gonzalo, 80, gideklara nga dead on arrival sa Juan Dosado Memorial Hospital sa lungsod sa Sogod.
Ang mga angol gidala sa Severo Verallo Memorial Hospital sa dakbayan sa Bogo.
Matud sa drayber nga si Francisco Hortelano, 37, patungas sila sa bungtod dihang kalit napalong ang makina niini ug nalimbuwad. Mag-atubang og kasong reckless imprudence resulting in homicide and multiple physician injuries.
Sa laing aksidente, usa ka barangay tanod nga giilang si Cristito Otom Sr., 59, ang patay human kini madasmagi og multicab sa Sitio Panagikan, Barangay Mananggal, Dalaguete mga alas 8:15 sa miaging gabii.
Si Otom paingon na mopauli sakay sa traysikad dihang naigo sa multicab nga gimaneho ni Robert Bontilao, 41, seaman ug taga-Barangay Veto, Minglanilla.
Gideklara nga patay si Otom pipila ka oras sa Cardinal Rosales Memorial Hospital. Si Bontilao gidala usab sa kapulisan sa Isidro Kintanar Memorial Hospital ug nasuta nga nakainom kini. (Ria Mae Booc ug Darrel Carumba/EIM) (BANAT BALITA)