CEBU, Philippines - Mikabat sa 50 ka mga precinct count optical scan (PCOS) machine ang naaberiya sa piniliay kagahapon sa habagatang distrito sa dakbayan sa Sugbo, matud pa ni Cebu City south district election officer Ferdinand Gujilde
Sumala ni Gujilde nga pipila sa naapektohan niini mao ang Don Vicente Rama Memorial Elementary School ug Zapatera Elementary School.
Hinuon nasulbad dayon ang maong problema pinaagi sa mga reserbang PCOS machine nga giandam sa Comelec.
Matud pa ni Gujilde nga mokabat sa 592 ka mga PCOS nga reserba ug giandam aron ihulip dayon sa mapalyar nga makina.
Samtang didto sa Zapatera Elementary School nagkagubot ang mga botante pag-abot ni north district congressional candidate Annabelle Rama. Kuyog sa iyang bana nga si Eddie Gutierez ug anak nga si Rufa Gutierez misuliyaw sa kalipay ang mga tawo nga mihimamat kang Rama.
Samtang ang kaatbang niya nga si kanhi Congressman Raul del Mar didto usab mobotar sa Lahug Elementary School kinsa milaom nga may mga suporter pa gihapon siya sa amihanang distrito sa dakbayan sa Sugbo. (BANAT NEWS)