CEBU, Philippines - Padayon gipangita sa kapolisan ang midunggab patay sa iyang silingan sa sitio Kalubihan sa barangay Marigondon, dakbayan sa Lapulapu sa miaging gabii.
Ang suspetsado giila nga si Julius Dacolcol alyas John-John, hingkod, kinsa miluba patay ni Wilan Igot, 26, minyo nga iyang silingan.
Si PO2 Winston Ybanez sa kapolisan sa maong dakbayan nga nahinabi sa Banat News miingon nga kuyog sa biktima ang iyang asawa nga naglakaw paingon sa gipasiugdahang disco sa maong dapit alang sa gipahigayong pista sa maong lugar. Matud pa ni PO2 Ybanez nga ang suspetsado kinsa gikan sa sulod sa diskohan migawas kini ug gisugat og dunggab ang biktima. Ang biktima kinsa nasabak sa dughan gihatud dayon sa iyang asawa ngadto sa Mactan Doctors Hospital apan gideklarar kini sa mga doktor nga dead on arrival.
Dugang pa ni Ybanez nga wala pa nila matataw ang hinungdan sa maong pagpanunggab samtang padayon pa nilang gipangita karon ang suspetsado kinsa nakaikyas dayon human s a maong hitabo. (BANAT NEWS)