CEBU, Philippines - Ang dakong opisyal sa Associated Labor Union-Trade Union Congress of the Philippines (ALU-TUCP) mihulagway nga makahatag hinuon og kadaut sa kandidatura nila ni Mayor Michael Rama ug Edgardo Labella ang pag-endorso kanila ni kanhi senador Ernesto Herrera.
Si Art Barrit, ang pangulo sa ALU-TUCP Education and Training department, miingon nga wala ta tuohi si Herrera sa mga sakop sa ALU-TUCP ug matud ni Barrit nga maapektahan pa hinuon ang kandidatura nila ni Rama ug Labella niini.
“Ang pag-endorso ni Herrera kanila ni Rama ug Labella maisip nga Kiss of Death,†matud ni Barrit.
Gipahinumdoman ni Barrit ang katawhan, ilabi na ang mga yano nga mamumuo, sa gihimo ni Herrera kaniadto nga siya maoy giisip nga “father of contractualization†nga nagtugot nga maligalisar ang kontraktwal.
Matud ni Barrit nga wala gayud makaorganisar og union si Herrera atul sa iyang pangatungdanan sa ALU-TUCP hangtud nga gitangtang siya sa katungdanan.
Gihulagway ni Barrit nga ang balaud nga giumol ni Herrera makadaut sa mga mamumuo ug nakabenipisyo sa mga agawon nga aron dili mahimong regular ang usa ka kawani.
Nahibaw-an nga ang ALU-TUCP mituboy sa kandidatura ni Kongresista Tomas Osmeña ug sa tanang kandidato sa Bando Osmeña Pundok-Kauswagan (BOPK).
Matud ni Barrit nga nasayud siya nga ang pamahayag ni Herrera nga ang TUCP nagsuporta sa kandidatura ni Rama ug Labella dili tuohan sa mga sakop nila nga mamumuo. (BANAT NEWS)