CEBU, Philippines - Miulbo ang kaguliyang sa bukirang barangay sa lungsod sa San Fernando dihang usa ka kandidato pagka-konsehal sa maong lungsod uban sa laing tulo ka lalaki nga pulos armado giingong nagbahis ug nanghasi kagahapon sa buntag.
Gani ang Toyota Corola nga nagtangag sa plakang GKA-705 nga gisakyan sa grupo ni Engr. Estanislao Jusayan, kandidato pagka-konsehal ubos sa partido ni Mayor Antonio Canoy sa maong lungsod giingong gibabagan sa mga supporter ni mayoral candidate Ricardo Reluya sa maong lungsod.
Ang hepe sa kapolisan sa lungsod nga si Senior Inspector Gerard Ace Pelare, kinsa maoy nangulo sa pagresponde sa maong hitabo mihiling sa sulod sa maong sakyanan apan giingong wala sila’y nakitang mga armas niini.
Sa laing bahin, ang kanhi kagawad sa barangay Balungag sa maong lungsod nga si Ma. Louella Baringui-an kinsa supporter sa mga Reluya mibutyag sa mga tigbalita nga tulo ka mga motorsiklo nga adunay mga angkas miabot sa ilang lugar ug nangrakrak sa ilang balay kagahapon sa mga alas 2:00 sa kadlawon.
Matud ni Baringui-an maayo na lang gani nga nakabantay sila ug nakahapa sa sawog hinungdan nga wala sila mangaigo.
Gipakita ni Baringui-an ang mga kabhang sa bala nga napunitan nila human sa pagpangrakrak.
Apan ang maong hitabo wala ipa-blotter ni Baringui-an sa buhatan sa mga polis.
Gawas niini si Brian Baring nga taga sitio Sambolawan ug mga suporter usab ni Reluya, mi-report kagahapon sa buntag sa kapolisan nga niadtong Sabado sa alas 10:30 sa gabii samtang siya ug ang iyang asawa didto sulod sa ilang balay nakurat sila dihang miabot ang wala hiilhing mga armadong tawo ug gipagawas sila sa ilang balay.
Giingong ang maong mga lalaki nga nagtaptap sa nawong nagpaila nga mga polis ug usa niini mition og pusil ngadto sa iyang asawa, samtang ang upat mipugos og sulod sa ilang balay tungod kay giingong aduna kini gipangita.
Hinuon mibiya usab dayon ang maong mga lalaki nga wala mopasakit kanila .
Kagahapon sa buntag ang mga residente sa sitio Kiw-kiw, bukirang bahin sa barangay Pitalo mibati usab og kahadlok gumikan sa mga buto-buto sa armas nga ilang nabati apan wala sila masayud kun kinsay responsabli niini hinungdan nga naglumba ang mga tawo sa pagpanagan ug pagpangita og katagoan.
Si Pelare nga nahinabi sa mga tigbalita nagkanayon nga gihigpitan nila pag-ayo ang seguridad sa maong lugar ug gituohan niya nga kining tanan may labot sa piniliay karong adlawa. (BANAT NEWS)