CEBU, Philippines - Gihatdan karon sa dakbayan sa Talisay og tubig ang barangay Maghaway usa sa bukirang barangay sa siyudad tungod sa kahinay sa agas sa tinubdan sa ilang tubig bunga sa sobrang kainit.
Si Talisay City Administrator Richel Bacaltos nagkanayon nga hinay kaayo og agas karon ang mga tinubdan sa tubig diha sa maong barangay ug apektado kaayo ang mga residente sa lugar hinungdan nga gipasuplayan kini og tubig sa bombero.
Matag buntag ug hapon usa ka truck sa bombero ang mosaka ngadto sa Maghaway nga magdala og tubig sukad sa milabay’ng semana.
Kahinumduman nga sa milabay’ng mga tuig dihang grabe usab kaayo ang kainit ang siyudad mi-supply usab og tubig ngadto sa maong barangay.
Matud ni Bacaltos nga sa pagkakaron wala pa sila makadawat og reklamo gikan sa ubang bukirang barangay kabahin sa kakuwang og tubig.
Naglaom hinuon si Bacaltos nga kun matapos na ang ting-init mabalik ra sa normal ang agas sa mga tubod diha sa maong barangay nga kuhaan og tubig sa mga tawo. (BANAT NEWS)