Goons, guns, gold ug drugs

CEBU, Philippines - Mga goons, mga armas ug sample ballots nga may pasupot nga kwarta nga gidudahang ipalit og botos ug ingon man ilegal nga drugas ang nangadakpan kagahapon sa managlahing mga lungsod sa lalawigan sa Sugbu .

Upat ka mga gidudahang goons sa usa ka partido sa lungsod sa Santander ang nangasikop human makuha-i og mga high-powered firearms, drugas ug sample ballots ug kwarta sa miaging gabii diha sa barangay Talisay sa maong lungsod.

Ang mga nasikop giilang sila si Arnel Posadas alyas Amos,20; Arnel Estoque, 21; Rican Valiente, 22; ug Glenn Valiente Merlo alyas Boyet, pulos molupyo sa Negros Oriental. Sa pasiunang imbestigasyon sa kapolisan giingong adunay tawong misumbong kabahin sa upat ka lalaking nanghatag og mga sample ballots nga gipalugpitan og kwarta.

Tungod sa maong report daling giadto sa kapolisan ang maong barangay ug didto ilang nasakpan ang upat ka lalaki nga kadudahan ang lihok hinungdan nga ilang gisita.

Apan usa sa mga lalaki nga si Posadas ang nakit-ang nagbitbit og armas hinungdan nga sila gisikop. Usa ka kalibre .45 Colt pistol nga adunay lima ka buhing bala ang nakuha gikan kaniya.

Nakuptan usab si Estoque kinsa nakuhaan og usa ka “apple type” hand grenade samtang sila si Valiente ug Merlo nakuhaan og mga sobre nga adunay sud nga sample ballots nga giingong adunay gipasupot nga kwartang tagsa ka libo ka pesos.

Gawas niini, nakuha usab ang napulo ka gituohang shabu nga adunay upat ka aluminum foil strips ug usa ka lighter.

Matud pa sa mga suspetsado nga ang tanang nakuha sa kapolisan pulos lang mga planted ug wala sila maghupot sa mga giingong ebidensyang nakuha gikan kanila.

Giangkon hinuon nilang gisuholan sila aron motabang sa pagpangampanya sa usa ka politiko nga tag P200 ang inadlaw.

Ang hepe sa kapolisan sa lungsod sa Santander, Sr. Insp. Abell Laborte miingon nga ilaha karong gisusi kung may criminal records ang upat ug tun-an pa kung unsang kaso ang ipasaka batok kanila.

Usa ka Floriano Merallo nga giingong tigpamaba sa  kandidatong wala pa hinganli sa kapolisan planted ang tanang ebidensya nga nakuha gikan sa mga suspek.

Gihimakak usab niyang ilang mga sakop o gi-hire ang upat tungod kay wala sila makaila kanila. Mipasangil siya sa kaatbang nga partido nga maoy utok sa tanan tungod kay dili buot nga magpapildi.

Sa lungsod sa Alegria,unom ka mga lalaking taga barangay Ermita sa Cebu City ang nadakpan sa sitio Libo, barangay Lipanto niadtong Biyernes sa buntag human giingong nakuhaan og mga armas  ug ilegal nga drugas.

Ang nangadakpan mao sila si Michael Gramatica, 23;  Jojie Alforque,24; Larry Banalolan Paulo, 22 ; Odion Pastor,23; John Carl Dakay,24; ug Alfer Tupsa, 24.

Ang mga nadakpan kasamtangang nagpuyo sa panimalay ni Bimbo Endona ug Michelle Paloma sa maong lugar.

Matud ni PO2 Bismark Babira sa Alegria Police Station nga nahinabi sa Banat News, adunay mga molupyo sa maong lugar ang misumbong kabahin sa mga kadudahang tawo nga nagpakita-kita og armas.

Ang grupo ni Insp. Sandy Roble daling misusi sa dapit ug nadakpan ang unom. Nakuhaan sila og usa ka calibre 357 revolver uban sa mga bala, pinaketeng gidudahang shabu ug drug paraphernalia.

Matud pa nga giangkon nila nga 19 sila ka tawo gikan sa Cebu City nga gi-hire sa  usa ka kandidato pagka-konsehal  alang sa eleksyon ugmang adlawa.   Si PNP Director General Allan Purisima kinsa mibisita dinhi sa Sugbu kagahapon miingon nga ang problema sa mga goons dili lang nahitabo dinhi sa Sugbu kay mas grabe pa sa ubang mga lugar sa nasud.

Si Purisima kinsa milibot sa nasud agi og pagsusi sa preparasyon sa kapolisan sa piniliay miingon nga kun itandi ang Central Visayas sa ubang mga rehiyon mas malinawon kini. (Lesley Caminade-Vestil, Darrel Carumba ug Queenie Anne Vidal,CNU Intern/EIM) (BANAT NEWS)