CEBU, Philippines - Gisugdan na sa Civil Service Commission (CSC)7 ang pag-imbistigar sa giingong pagpatrabaho og 17 ka nurse sa mga opisyal sa dakbayan sa Sugbo nga wala subaya ang tukma nga lagda.
Si Regional Director Karin Litz Zerna sa CSC mimando sa hepe sa CSC-Cebu South Field Office pag-imbistigar sa reklamo ni Konsehal Margarita Osmeña.
Iyang gimandoan si director Nissi Cherith Asis nga mosumiter kaniya og report sa resulta sa imbistigasyon nga iyang pagahimoon.
Si Konsehal Osmeña nakadawat og report nga ang administrasyon ni Mayor Michael Rama mi-hire og 17 ka nurse alang sa Guba Emergency Hospital sa Barangay Guba ning dakbayan kaniadtong Hulyo ngadto sa Disyembre sa miaging tuig. Kini maoy rason nga giawhag niya ang Civil Service Commission nga sutaon kun tukma ba ang gihimo sa administrasyon ni Rama nga mi-hire og mga nurse nga wala sunda ang gilatid sa balaod.
Basi sa report, ni Osmeña kinsa maoy tsirman sa Budget and Finance Committee sa Cebu City Council ang maong mga nurse gidawat nga wala moagi og examination ug wala usab paatubanga sa Personnel Selection Board (PSB).
Si Evangeline Abatayo, hepe sa Human Resource Development Office (HRDO), mibutyag nga sa 17 ka gidawat nga nurse ang duha kanila wala pakuhaa og written examination.
Samtang tulo lang ‘usab sa 17 ka nurse ang mi-agi og interview sa mga sakop sa Personnel Selection Board. Gisaad sa CSC nga pahibaw-on nila ang City Hall sa resulta sa ilang gihimo nga pakisusi. (Rene Boromeo/WC) (BANAT NEWS)