CEBU, Philippines - Talandugon ang kahimtang sa usa ka mabdos human kini dunggaba sa iyang kapuyo didto sa sitio Buyong, Brgy. Maribago , dakbayan sa Lapulapu sa milabay’ng gabii.
Ang biktima mao si Faith Inco Dizon, 25, dalaga nga may kapuyo ug nagsabak og walo ka bulan, samtang ang suspetsado mao ra usab ang iyang kapuyo nga si Junrey Cacha, 32, ulitawo.
Sumala sa kapolisan nga sa alas 11:15 sa milabay’ng gabii, didto sulod sa ilang balay nagpaabot ang biktima sa iyang kapuyo , apan sa pag-abot niini sa walay igong hinungdan gideretso og luba ang biktima.
Samdan ang biktima sa bukobuko ug dali kining gihatud ngadto sa Lapulapu City Hospital apan gibalhin usab dayon ngadto sa Vicente Sotto Memorial Medical Center sa dakbayan sa Sugbo.
Nasuta sa kapolisan nga milapos ang kutsilyo sa baga sa biktima .
Gisukit sa kapolisan nganong giluba niya ang iyang kapuyo, apan nagdumili pagtubag ang suspetsado.
Sa pagkakaron gitanggong na kini sa prisohan ug kasong parricide ang kaso nga ipasaka batok niini. (Bong Soriano/WC) (BANAT NEWS)