Polling areas sigurohong dunay kuryente

CEBU, Philippines - Siguraduhon sa Cebu City government nga adunay paigong sugang dagitabnon ang tanang mga eskuylahan nga  gihimong polling precincts alang sa umaabot nga piniliay karong Lunes.

Ang Oplan Kahayag nagsugod na sa pag-inspeksyon ug pag-ilis sa mga guba nga linya sa kuryente sa mga polling areas sa Cebu        City.

Ang piniliay karong Lunes mao na ang ikaduhang automated elections sa nasud ug dako ang papel sa hustong supply sa kuryente sa mga tunghaan diin mamotar ang mga tawo tungod sa   paggamit sa mga Precinct Count Optical Scan (PCOS) machines.

Ang maong programa gilangkoban sa mga ahensya sa gobyerno sama sa Department of Education (DepEd), Association of Electrical Engineers, Department on Public Services (DPS), ug ang Visayan Electric Company (VECO).

Si Mayor Michael Rama nagkanayon nga iyang giporma ang maong grupo  dunay makaatiman kung may kakulian sa kuryente.

Plano sa mayor nga himuon nang permanente ang maong grupo aron bisan dili eleksyon adunay masangpit ang mga konsumidor kung magka-problema sila sa ilang kuryente ilabi na ang mga linya sa kuryente sa mga eskuylahan. (/EIM) (BANAT NEWS)