CEBU, Philippines - Dili diskwalipikado ang Alliance for Nationalism and Democracy (ANAD) Party-list ug 11 ka laing grupo sa pag-apil sa piniliay karong Lunes subay sa hukom sa Korte Suprema.
Kini ang giklaro sa ubang grupo nga kusganong nikondenar sa desisyon sa Commission on Elections nga gipaagi lang sa media ug walay opisyal nga resolusyon.
Ang Union of Responsible AFP (Armed Forces of the Philippines) Officers ug New Guardians for Freeman and Democracy, Inc. (NGI) ang kusganong nikondenar sa pahibawo ni Comelec chairman Sixto Brilliantes ngadto sa media nga nag-disqualify sa Anad.
Hangtud kagahapon sa hapon, ang ANAD wala pa makakuha og kopya sa resolusyon nga giingong gipugngan pa sa Comelec nga makagawas, sumala pa sa ikaduhang nominee sa Anad nga si Baltaire Balangauan.
“A black propaganda against Pro-Democracy groups – we strongly condemn this act against the Constitution,†matud pa sa Union.
Nanawagan ang Union sa publiko sa pagpili sa bisan asa sa nahisgutang grupo nga kusganong nanalipod sa demokrasya sa nasud.
Subay sa desisyon sa Korte Suprema nga ang pag-disqualify sa Anad ug ubang grupo nga naglingkod na sa katungdanan iya na sa House of Representatives Electoral Tribunal (HRET) base sa gimando sa Konstitusiyon.
Gihulagway usab sa NGI nga imoral ug ilegal ang gihimo sa Comelec sa pagpaminaw sa grupong Kontra Daya, nga giingong legal communist front sa Communist Party of the Philippines. (BANAT NEWS)