CEBU, Philippines - Gisusi ang love angle sa pagkaangol sa usa ka ginang nga gipusil sa usa ka babaye didto sa Sityo Ilakot ,barangay Cutcut lungsod sa Liloan sa miaging buntag.
Ang biktima mao si Catherine Llienes, 41, buwag na sa bana, ug nagpuyo sa maong lugar. Si Junjun Tundag, usa sa mga nakasaksi mibutyag sa kapolisan nga usa ka babaye nga wala hiilhi nga nag-backride sa usa ka motorsiklo ang miluthang sa biktima.
Si PO3 Renato Pendo sa Liloan Police Station mitug-an sa Banat News nga naglakaw ang biktima sa barangay road paingon sa iyang trabahoan sa Venus Craft dihang kalit kining gisakdapan sa motorsiklo ug dayon gipusil tulo ka higayon sa backrider nga babaye.
Nalup-og sa karsada ang biktima human masabak sa bala ang nagkalainlaing bahin sa lawas, ug dayon gibiyaan sa mga kriminal.
Ang kapolisan sa maong lugar nga mirespondi sa maong hitabo mao nay mihatud sa biktima sa tambalanan sa dakbayan sa Sugbo nga ubos sa talandugong kahimtang.
Ang kapolisan nagduda nga love angle ang motibo sa maong krimen ug padayon nilang gipangita karon ang kriminal. (BANAT NEWS)