Mga PCOS nga depektoso mikagar

CEBU, Philippines - Nagkalainlaing  depekto  ang  nasinatian  sa  mga  Precint Count Optical Scan (PCOS) machine sa nagkalainlaing  lugar  sa lalawigan  sa Sugbo  sa gipahigayong  Final Testing and Sealing (FTE) niini  kagahapon.

Ang  pagkagar  sa maong  mga  kahimanan nasinatian  sa    barangay  sa dakbayan  sa Talisay  nga  naglakip  sa Tabunok, Linao, San Isidro  ug San Roque.

Matud pa sa Provincial Comelec Supervisor Eddie Aba  nga  gawas  sa dakbayan   sa Talisay  nga  nakasinati 5 ka mga depektusong PCOS machine,   nasugamak  usab  sa susamang  problema  ang  lungsod  sa San Fernando  diin  duha  ka  PCOS machine  ang  mikagar, Bantayan, 2 gihapon, Compostela 1 ug Bogo 1.

Si Efren Arnejo, assistant election officer sa Talisay  kinsa  usa  usab  ka IT  expert  nagkanayon  nga ang  mga kakulian  nga  nasugatan  sa maong  mga PCOS machine  mao  ang di maka-print, di moandar ang  button, back up memory, ug  ka-walay  signal .

Hinuon matud  pa  ni Aba  nga  mas  maayo  ra  nga  nasayran  dayon  ang  maong  problema  aron  kailisan  dayon  kini  sa  mga  gireserba  nga  mga PCOS  machine.

Sa samang  higayon  gipahibawo  ni Aba  nga sugod  karong  adlawa  hangtud  sa adlaw  sa election  sa Lunes, higpit  na  nga gipatuman  ang  liquor ban  diin  ang  masakpang  molapas  niini  mag-atubang  og  bug-at nga  silot. (BANAT NEWS)