Mayor misagop og tulisan?

CEBU, Philippines - Kasamtangang  gipapuyo sa resthouse   sa  usa  ka  mayor    ning  lalawigan  ang  mga  sakop  sa Parojinog Robbery Group  gikan  sa Ozamis City.

Si Sr. Supt. Mariano Natuel Jr., hepe  sa Cebu City  Police Office kinsa  wala  mohingalan  sa maong  mayor ug  sa lugar  nga  gidumala  niini, mibutyag  sa  mga  tigbalita  nga mao  kini  kasayoran  nga  iyang  nakutlo gikan  sa  taho sa mga  sakop sa City Intelligence Branch (CIB). 

Hinuon  matud pa ni Natuel nga kining maong kasayoran  ila  pa   nga  ipaubos sa beripikasyon. Midugang  si Natuel   nga  dako  ang  posibilidad  nga  gamiton  kining  grupoha  sa maong  politiko karong  umaabot  nga  election.

Ang hepe  sa CIB nga si Chief Insp. Romeo Santander mibutyag usab nga ilang  gitino  karon ang tanang taho nga ilang nadawat  aron sutaon  ang  kabalido  niini.

Dugang pa ni Santander nga nakig-alayon  na  sila  karon sa mga sakop sa Provincial Intelligence Branch (PIB) tungod kay    ubos  man  sa  ilang  area  of jurisdiction  ang  lugar  nga  nahimutangan  karon  sa maong  mga  tulisan.

Sa milabay’ng semana  nahipos sa kapolisan   ang  mga  armas  sa  maong grupo    nga  gibilin  sa sakyanang  giabangan  niini dihang  nasugatan  nila  ang  nagpatrolya  nga  kapolisan.

Usa sa mga suspetsadong  tulisan ang nailhan sa drayber  mao si Marlon Parojinog ang leader sa Parojinog Robbery Group. (BANAT NEWS)