PRO7 andam na sa election

CEBU, Philippines - Andam  na ang  kapolisan  sa Central Visayas  sa pagbantay  sa kalinaw sa piniliay sa  Mayo 13.

Kini  ang  pasalig  ni  Chief Supt. Marcelo Garbo nunot  sa mando  ni  DILG Secretary Mar Roxas pagplastar  sa detalyadong  pagpatuman  sa "Oplan Last Two Weeks" .

Ang  maong  kampanya maoy  gibasehan  ni  Roxas  sa  iyang pagsalig  nga walay  duha-duha  kun  sundon  lamang  kini  sa tanang  hepe  sa kapolisan  way katarungan  nga  di  malinawon  ang  eleksyon.

Ang  Oplan  Last Two Weeks  gipatuman  duha  ka semana  sa  dili  pa  sa piniliay  diin  ang  tanang  mga  panukdanan  sa kapolisan  gihan-ay  ug  maoy  tumanon  sa mga  kapolisan  sa tanang  rehiyon.

Si  Garbo  sa  iyang  bahin  nagkanayon  nga  bisan  kun  may  mga  lugar  nga  gidudahan  sa kadaghanan  nga  magkaguliyang  sa umaabot  nga  election, gipaniguro  niya  nga  dili  na  mahitabo  ang  maong  mga kabalaka  tungod  sa panukdanan  nga  giandam  sa kapolisan.

Usa  niini  mao  ang  pagtukmod  sa kapolisan  sa magkaatbang  nga  partido  pag-umol  og peace  covenant  kon kasabotan sa kalinaw  sa umaabot  nga  Mayo 13,  sumala  ni  Garbo. (/WC) (BANAT NEWS)