Biktima sa sunog gilutoa’g pagkaon

CEBU, Philippines - Mga linuto na  nga pagkaon  ang  gipang-apud-apod sa mga  tinugyanan  sa Mandaue City Social Welfare and Services(MCSWS)  ngadto  sa matag  pamilya  nga  apektado  sa sunog  nga miulbo  sa sitio Marna,  barangay  Subangdaku, sa maong  dakbayan  sa miaging  hapon.

Ang  pagpanghatag  og  pagkaon  gipangunahan  ni  Violita Cabada  ngadto  sa 13  ka  pamilya  nga nasunogan.

Matud  pa  ni  Cabada  nga  sulod  lamang  sa tulo  ka adlaw  ang  pagpanghatag  nila og  mga  linuto nang  daan  nga  pagkaon   base  sa lagda  sa  lokal  nga  kagamhanan  nga  ilang  gituman.

Human  niini  mga  hilaw  na  hinabang  ang  ilang itunol  ngadto  sa  mga  biktima  sama  sa bugas,  mga  linatang  pagklaon,  mga gamit  sa kusina  ug  uban pa.

Si  Roger Paller,  public information officer  sa  maong  dakbayan  mibutyag  sa Banat News   nga  ang  13 ka pamilya  nga  nabiktima  sa sunog  sa pagkakaron temporary  kining  gipapuyo  sa usa  ka bakanteng  luna  duol  sa  nasunogan  samtang  gipahulam  sila  og  tulda  sa  kagamhanan.

Apan  samtang  wala  pay  klase,  gipaningkiamotan  nilang  ibalhin  sila  nga temporary  gihapon  sa  gym  ug eskuylahan  sa maong  barangay.

Kini  aron  makalikay  sa hilabihan  kainit  sa adlaw  ang  mga biktima  ilabi  na  sa  gagmay  nga  mga anak  niini.

Midugang si  Paller  nga  gideklarar na ubos    sa state  of calamity  ang  barangay  Subangdaku base  sa nalig-on  sa  konseho  sa barangay  sa    sesyon  nga  gipahigayon  niini sa  pagpanguna  ni  barangay  Captain Ernie  Manatad,  kinsa  maoy  kasamtangang  president   sa Association  of  Barangay  Council  Federation  sa dakbayan.

Ipasabot  nga  ubos  sa state of calamity,  nagkahulogan  nga  libreng  makagamit  sa iyang calamity  fund  ang  maong  barangay  aron  ikatabang  sa  mga  biktima  sa sunog.

Hinuon matud  pa  ni Paller  nga  ang  konseho  sa dakbayan  sa Mandaue  mohimo  pa  usab  og  resolusyon  nga naglig-on  sa resolusyon  sa konseho  sa barangay  Subangdaku  bahin  sa deklarasyon  ubos  sa state  of  calamity  sa maong  lugar  agi  og  pagtuman  sa gimando  ni  Mayor Jonas  Cortes.

Subay sa naandan  na  nga  pamaagi , matag  pamilya  nga  mabiktima  sa  sunog  makadawat  og  P10,000  nga  hinabang, samtang P5,000  usab alang nanag-abang  sa  mga  balay  nga  nasunog. (BANAT NEWS)