CEBU, Philippines - Ang Philippine Cooperative Central Fund Federation (PCF) magsaulog sa ilang ika-15 ka tuig nga kasumaran ugmang adlawa. Ang PCF mao gilangkoban sa 252 ka primary member cooperatives lukop nasud.
Ang PCF ang naporma dihang naghiusa ang upat ka mga pioneer cooperatives dinhi sa Sugbu nga mao ang Cebu CFI Community Coop; Cebu Peoples Multi-Purpose Coop; Guadalupe Community Multi-Purpose Coop ug ang Cordova Multi-Purpose Coop.
Matud pa ni Zenaida Novabos-chairperson sa PCF Board of Directors niadtong 1978 walay bangko nga mopahulam og pundo sa mga kooperatiba kay wa silay salig niini maong naghugpong ang maong upat ka kooperatiba pinaagi sa pag-amot og tag P5,000 matag usa isip pundo.
Sa paglabay sa mga katuigan ang natigom nga P20,000 nga pasiunang pundo sa PCF miabot na karon og P390 milyones (2010). Nakapadagan kini og P400 milyones nga investments ug deposits gikan sa member-cooperatives ug nakapautang na og P600 milyones sa mga sakop nga kooperatiba.
Atol sa gipahigayong tigum kagahapon sa PCF building sa Capitol Site, mitambong ang mga sakop sa board nga mao sila si Betta Socorro Salera-Chief Executive Officer; Zenaida Novabos-Chairperson of Board of Director, Leovigildo Elmaco-Vice-Chairperson of Board of Director ug mga board of directors nga sila si Renato Martija, Lydia Canalija, Atty. Peter Panis, Florencio Jacela, Vicente Castro ug uban pa.
“Ang kinauyokan sa grupo (PCF) mao gyud ang pagsalig sa mga members,†matud pa ni Salera nga buot ipasabot mao ang pagbayad gyud sa gihulam nga pundo sa pederasyon.
Ang PCF adunay mga kooperatiba alang usab sa Persons with Disabilities (PWDs) aron sa ingon sila matabangan. Dinhi sa Visayas nahamutang ang maong koop sa Toledo, sa Luzon anaa sa Nueva Ecija samtang sa Mindanao anaa sa General Santos.
Si Atty. Panis sa iyang bahin miawhag usab sa mga kooperatiba nga wala pa makatuman mapatik sa R.A. 144 nga mao ang pagparehistro sa Cooperative Development Authority tungod kay giingon nga 1/3 pa lang ang mituman niini ug peligro makanselar ang ilang kooperatiba. (Kristianne Marie Alcaria,CNU Intern/EIM) (BANAT NEWS)