Mineral water gikagubtan

CEBU, Philippines - Mitumaw ang tensiyon niadtong Huwebes sa gabii diha sa city hall sa dakbayan sa Talisay dihang ang mga supporter sa Liberal Party natahap sa giingong mga karton nga gihakot sa administrasyon gikan sa office of the treasurer ngadto sa cash division nga tapad nga buhatan.

Si incumbent councilor Val Ylanan sa Liberal Party mibutyag sa mga tigbalita nga mga alas 7:00 sa gabii niadtong Huwebes giingong dunay mga supporter nila ang nakakita nga dunay mga sakop sa Civil Security Unit nga naghakot og mga karton gikan sa treasurer’s office paingon ngadto sa cash division.

Giingong dunay adventure nga sakyanan nga nagtangag sa plakang GPP-860  ang misaka diha sa kilid sa parking area sa city hall sa agianan sa mayor ug mga 15 minutos ang nakalabay mibiya ang maong sakyanan.

Giigong niadtong higayona nakita sa mga supporter si Talisay City Administrator Richel Bacaltos, city treasurer Emma Macuto ug Marissa Cabardo sa cash division.

Si Macuto nga nahinabi sa mga tigbalita kagahapon nagkanayon nga mga mineral water ang gipanghakot apan wala kini isulod og karton plastik ang gisudlan niini.

Si Bacaltos giingong igo lang mitimbaya kang Macuto ug nangutana kung okupado ba kini.

Matud ni Macuto nga sukad pa niadtong Abril 1, 2013 kanunay na silang nag-overtime gikan sa alas 5:30 sa hapon hangtud sa alas 8:30 sa gabii tungod kay nangandam na sila alang sa eleksiyon.

Ang treasury maoy modawat sa mga mangabot nga election paraphernalia ug sila usab ang moapod-apod niini ngadto sa mga presinto.

Ang hepe sa CSU nga si Roger Villaver nagkanayon usab nga mga tubig ang gihakot sa iyang mga sakop gikan sa treasury office ngadto sa cash division. Ang maong mga bottled water giputos kini og plastik dili karton.

Si Efren Arnejo Jr., election assistant sa dakbayan sa Talisay nagkanayon kini nga ang mga official ballot, PCOs, mga ballot box ug ubang mga election paraphernalia ang custodian niini ang treasury.

Si Arnejo mipasabot nga ang Comelec igo lang mo-coordinate sa treasury.

Sa laing bahin, gibutyag ni Macuto nga niadtong Huwebes sa alas 2:30 sa hapon gitawagan sila sa 2GO nga shipping company diin nagpahibawo kini nga moabot na ang official ballot karong adlawa (Mayo 3, 2013) apan walay tukmang oras ang gisulti.

Matud ni Macuto nga human siya masayod nga moabot ang mga official ballot mipadala dayon sila og komunikasyon niini ngadto sa political parties.

Karong Martes gikatakdang moabot ang mga PCOs machines ug iapod-apod dayon kini ngadto sa mga presinto.

Gibutyag ni Macuto nga 128 ka PCOs machine ang ipaapod-apod ngadto sa mga presinto diin pito niini adto sa barangay Lawaan III, walo sa Bulacao, tulo sa Candulawan, lima sa Linao, unom sa Lawaan I, upat sa Maghaway, duha sa Tapul, walo sa San Isidro, 11 sa Tabunok, pito sa Lagtang, lima sa Jaclupan, duha sa Camp IV, duha sa Manipis, upat sa Biasong, lima sa Pooc, siyam sa Mohon/Lawaan II, pito sa Dumlog, pito sa Poblacion, walo sa Cansojong, walo sa Tanke ug 10 sa San Roque.

Si Macuto midugang nga ang tulo ka mga bus sa siyudad maoy gamiton nga kargahan sa mga PCOs machine ug sa ballot boxes. (Brenda D. Batuto uban ni Queenee Anne G. Vidal, CNU Intern) (BANAT NEWS)