CEBU, Philippines - Nag-atubang karun og kaso ang usa ka maestro sa usa ka pribadong tunghaan human kini gipasanginlang nangmolestiya sa iyahang estudyante bugti sa bayad nga pang-load ug uban pa.
Ang 17 anyos nga lalaki mipasaka og reklamo batok sa iyang maestro.Matud sa affidavit sa biktima gihangyo na niini ang suspek nga undangon ang mga malaw-ay nga gipangbuhat niini kaniya apan nagmagahi kini.Ang biktima estudyante sa Passerelles Numeriques, usa ka non-profit organization nga nagtabang sa mga kabus nga kabataan ug na-enroll sa usa ka unibersidad diin magtudlo ang maestro.
Unang giabuso sa suspek ang biktima niadtong Christmas break tuig 2011 diin gipalitan siya og sapot sa suspek nga diay to panghaylo ra sa himuong pagmolestiya kaniya sud sa boarding house niini sa Labangon.Human siya lugosa sa suspek gipakaon siya sa usa ka fast food chain ug gihatagan og P200 nga pang-load.
Apan wala mohunong ang suspek sa pagbinastos niini ug nasundan pa kini.
Nahibaw-an na lang niya nga dunay estudyante nga gihagbong sa suspek tungod kay dili magpahilabot sa maong maestro. Kini maoy hinungdan sa pagsang-at niya og kaso inabagan sa kadagkoan sa Passerelles Numeriques batok sa maong magtutudlo. (Mylen Manto ug Kristianne Marie Alcaria, CNU Intern/EIM) (BANAT NEWS)