Convoy sa kandidato pagkamayor gibabagan sa dalan

CEBU, Philippines - Moabot og 17 ka mga tawo apil na ang mga kandidato pinangulohan ni  Mayor Jay Olivar ang  mireklamong natanggong sa dalan tungod kay gibabagan og mga kahoy ingon man heavy equipment ang agianan gikan nangampanya sa barangay Gawaygaway sa lungsod sa San Remegio niadtong niaging alas 3:30 sa hapon.

Ang mga natanggong nga kandidato hapit duha ka oras mao sila si San Remegio mayor Olivar, ABC President Conrado Loon, ug mga kandidato pagka- konsehal nga sila si Benjamen Rondina, Jacinto Lipitin, Cerilino Mancao, Venicio Dejuya, konsehal Rey Tamboboy ug konsehal Jeremias Sincoran.

Ang ilang mga kauban nga apil sa natanggong mao sila si Teresito Ejuranggo, Gerson Delos Reyes, Ferdie Aragon, konsehal Leobe Crisostomo, konsehal Rami Veracruz og mga kauban nga sila si Rafael Tinapay, kanhi kapitan Napoleon Pepito, Dosdado Ponce ug Elisa Ponce.

Nagduda sila sa usa ka barangay kagawad nga kaalyado ni kanhi mayor Mariano Martinez nga maoy kaatbang ni Olivar sa eleksyon.

Matud ni PO3 Felipe Mandal sa San Remegio Police dihang nahinabi sa Banat News nga human nakuha ang gibabag nga kawayan pag-abot nila sa unahan dunay traktura maong nalangay na usab sila.

Si Olivar mibahad nga mopasaka og kaso batok sa mga mibabag sa maong agianan. (BANAT NEWS)