CEBU, Philippines - Suportado sa pundok sa mga mamumuo sa Sugbo ang 300 ka mga kawani sa Digitel Telecommunications Inc. kinsa nangatangtang sa trabaho nunot sa paghiusa sa kompaniya tali sa Philippine Long Distance Telephone (PLDT).
Si Atty. Virginia Pinlac mibisita sa Sugbo kagahapon aron pagpakigtagbo sa mga lider sa mga mamumuo sa Sugbo tumong usab sa pagpasalamat sa suporta ngadto sa iyang mga kliyente.
Ang nagsuporta nga grupo mao ang Alliance of Progressive Labor, Partido ng Mangagawa ug ang Associated Labor Union-Trade Union Congress of the Philippines (ALU-TUCP).
“We representatives of organized labor in Cebu express our solidarity with this cause against this giant corporate bully,†matud pa sa pamahayag sa grupo.
Ang grupo mosalmot sa dakong rally karong adlawa may kalabotan sa pagsaulog sa Labor Day.
Atol sa 888 News Forum sa Marco Polo Plaza kagahapon, gipahibawo ni Pinlac nga ang Korte Suprema mimando na sa PLDT sa pagpabalik sa trabaho sa 300 ka mga kawani.
Apan ang PLDT giingong nagdumili sa pagtuman sa kamandoan sa Korte Suprema.
Ang mga sakop sa Digitel Employee Union nahimong kabahin sa PLDT human niini mapalit sa naulahi sa miaging tuig.
Ang PLDT mipatuman sa contractualization nga mibabag sa pagsulod sa mga kawani sa Digitel hinungdan nga gipugos sa pagpadawat sa ilang termination.
Gikuha sila pagbalik sa PLDT isip mga kontraktwal nga mga kawani nga mabahas matag upat ngadto sa lima ka buwan. Midangop sa korte ang mga kawani ug nakuha ang pabor nga desisyon, apan giingong wala ipatuman sa Department of Labor and Employment (DOLE) ug PLDT ang maong desisyon.- (BANAT NEWS)