Labella supak nga ipribado ang CCMC

CEBU, Philippines - Supak si Cebu City vice-mayoralty candidate Edgar Labella nga dili na kinahanglan i-privitize ang Cebu City Medical Center tungod kay mas nangihanglan kini og dakung budget aron maserbisyuhan ang mga pasyente sa Sugbu.

Kahinumduman nga gipangusgan kaniadto ni south district Rep. Tomas Osmeña ang pag-privatize sa CCMC tungod daw sa kakulang sa mga equipment ug supplies maong  dunay mga pasyente nangamatay.

Apan matud ni Labella, nindot na karon ang CCMC kun itandi sa mga nilabay nga administrasyon tungod kay mas gipakusgan ni Mayor Michael Rama ang suporta sa maong tambalanan.

Aduna usab mga bag-ong mga equipment ang CCMC ug mga sophisticated machines nga makatabang sa mga pobreng pasyente.

Matud niya maglisod na gyud unya nga makabayad ang mga pasyente sa Sugbu kung himuon kining pribado kay mga kabos ang kasagarang magapatambal sa maong tambalanan.

Sumala pa ni Labella mas pursigido ang kadagkoan sa CCMC nga panindoton ug mapalambo pa ang maayong serbisyo sa maong tambalanan. (BANAT NEWS)