CEBU, Philippines - Gibuksan sa kagamhanan sa dakbayan sa Mandaue ang duha ka semana nga kalihokan sa pangilin ni Senyor San Jose alang sa kapistahan niini sa Mayo 8.
Ang programa sa pagbukas gipahigayon sa atubangan sa City hall nga gitambongan sa mga opisyal ug kawani sa kagamhanan sa dakbayan.
Gumikan niini giandam sa kagamhanan ang kada gabii nga mga kalingawan nga gituohang makapatagbaw sa tanan.
Samtang gipangunahan sa pagtambong ni Mayor Jonas Cortes ang “I am Mandaue movement,†usa ka programa nga mohatag og dugang pagpaila sa dakbayan pinaagi sa mga maayong gawi nga pasiugdahan sa mga kabarangayan.
Dinhi umolon sa matag pamilya nga pangunahan sa matag ginikanan ang kinaiya nga mahimong sumbanan sa katilingban.
Si Roger Paller nga maoy public Information officer sa Mandaue mipasabot nga ang maong programa gitumong usab aron ang matag panimalay manginlabot sa mga programa sa kagamhanan.
Gitataw niya nga ang gilusad nga programa maoy kabahin sa pagtuman sa kagamhanan sa gitawag nga Performance Governance System (PGS) nga gipasiugdahan sa Institute for Solidarity in Asia.
Kauban sa pagbukas sa maong kalihokan mao ang motorkada nga mitadlas sa mga kadalanan sa kasuokang bahin sa Mandaue nga natapos sa barangay Centro sa maong dakbayan. (/WC) (BANAT NEWS)