CEBU, Philippines - Gipatun-an ni Mayor Michael Rama ang posibleng pagpasaka og kaso batok sa mga tawo nga nagsigi’g babag sa clearing operation sa nasunog nga bahin sa Sitio Bato, Barangay Ermita.
Si Atty. Leslie Ann Reyes, usa sa mga abogado sa Cebu City Legal Office, mikuha na og kasayuran kagahapon gikan ni Raquel Arce, ang pangulo sa City Clearing Team.
Gisaysay ni Arce nga kaniadtong Biyernes sa dayon na nilang adto sa Sitio Bato aron tumanon ang kamandoan ni Mayor Rama dunay mga tawo nga mibabag kanila aron dili sila makasulod sa Sitio Bato.
Dihang mibalik ang Clearing Team nga gipangulohan ni Arce pagka hapon, nasayran nila nga giguba na usab ang payloader nga maoy gamiton sa paghawan sa nasunogan.
Giputol ang alambre sa ignition switch ug giguba usab ang linya sa krudo aron nga dili makaandar ang makina ug dili magamit ang payloader.
Matud ni Reyes nga gitug-anan siya ni Arce nga kagahapon sa buntag ang karsada paingon sa Sitio Bato gibabagan usab og sakyanan aron dili makasulod ang payloader.
Sa laing bahin, ang abogado sa Team Rama nga si Jade Ponce miingon nga dili tukma ang gihimo ni DILG Undersecretary Francisco “Bimbo†Fernandez nga miawhag sa kapolisan nga dili suportahan ang clearing operation sa Sitio Bato.
Matud ni Atty. Ponce nga ang mayor maoy gihatagan og katungod sa pagsuperbisar sa kapolisan nga anaa madestino sa ilang tagsa-tagsa ka territorial jurisdiction.
Ang clearing operation napahigayon hinoon gihapon kagahapon ug 20 ka adlaw ra ang tagal sa paghimo sa clearing ug ang reblocking sa dapit nga nasunogan. –/WC (BANAT NEWS)