CEBU, Philippines - Usa ang patay ug laing usa na-angol sa karambola sa duha ka grupo sa mga batan-on nga nag-inom didto sa Baywalk Food and Drinks sa Poblacion, siyudad sa Naga kagahapon sa alas 2:30 sa kaadlawon.
Ang namatay mao si Cristo Jay Canedo, 24, ulitawo, ug molupyo sa barangay South Poblacion, sa maong dakbayan, samtang ang na-angol nga nalandig karon sa tambalanan mao si Al Donnil Rabor, 27, minyo, nga taga North Poblacion, sa mao gihapong dakbayan.
Sa paghimo ning maong balita wala pa matumbok sa kapolisan ang mga miyembro sa pikas grupo nga maoy gika-engkwentro sa mga biktima.
Si PO1 Jimlani Alrasid sa Naga City Police Station mibutyag sa Banat News nga ang mga biktima ug ang mga kaengkuwentro niini pulos nag-inom sa maong lugar sa managlahiang lamesa.
Unya kalit lang mitumaw ang lalis sa mga sakop sa duha ka grupo nga miresulta sa rambol.
Apan usa sa mga misalmot sa maong karambola giingong nagdala diay og armas de fuego nga maoy namusil sa mga biktima.
Pulos nasabak sa dughan ug ubang bahin sa lawas ang mga biktima ug gihatod dayon kini ngadto sa South General Hospital sa siyudad sa Naga apan si Canedo gideklarar nga dead on arrival ( DOA).
Samtang ang laing biktima nagpabilin pa sa tambalanan tungod sa ka talandugon sa kahimtang niini.
Ang mirespondi nga mga polis nakapunit og upat ka kabhang mga bala sa kalibre .45 nga pistol nga gituohang gikan sa armas nga gigamit sa mga kriminal.
Ang kapolisan padayon pang nag -imbistigar sa maong hitabo ug milusad og hot pursuit operation pag-ila sa mga kriminal. (Darrel A. Carumba/WC)
Driver sa motor midasmag sa trak patay
Patay diha-diha ang usa ka 36-anyos nga driver sa motorsiklo human kini modasmag sa usa ka prime mover truck didto sa South Coastal Road , habig sa barangay San Isidro, dakbayan sa Talisay niadtong Sabado sa kaadlawon.
Ang biktima mao si Michael Deroy Flores, taga lungsod sa Pinamungahan, drayber sa Rusi nga motorsiklo nga nagtangag sa plakang 1274-GK.
Samtang ang drayber sa truck nga nagtangag sa plakang YKU-673 giila nga si Jemson Guevara Tamayo Jr., 25, taga Tangcologan, Bais, Negros Oriental.
Sila si SPO2 Elmer Saladas, SPO2 Nestor Canlobo, PO1 Ali Luntao ug PO1 Rey Fernandez sa Talisay Traffic Division maoy miresponde sa maong aksidente.
Si PO1 Luntao nga nahinabi sa Banat News kagahapon mibutyag nga si Flores nagsakay sa iyang motor gikan sa barangay San Isidro ug motabok unta sa karsada paingon ngadto sa barangay Dumlog.
Samtang si Tamayo kinsa nagmaneho sa nahisgutang truck nga puno sa bas nagbiyahe usab gikan sa habagatan paingon sa dakbayan sa Sugbo.
Apan pag-abot sa maong lugar , nakurat nalang siya dihang si Flores mikalit lang og dasmag sa ulahing ligid sa truck nga iyang gimaneho.
Atol sa maong hitabo, gipaubos sa “caution†signal ang traffic light sa eskina sa maong lugar ug walay traffic enforcer sa maong higayon.
Matud ni Luntao nga gumikan sa malagmit sa kakusog nga pagkadasmag, ang ulo ni Flores mibunal sa kaha sa sakyanan ibabaw sa ligid, dayon nagbuwag si Flores ug ang motorsiklo sa pagpangalagpot , 30 metros ang gilay-on gikan sa truck.
Ang Talisay Rescue Emergency Action Team (TREAT) nga maoy miresponde sa maong hitabo mideklarar nga patay na si Flores gumikan sa pagkalubyok sa ulo niini.
Si Tamayo nagtingkagol karon sa Talisay City detention Cell. (BANAT NEWS)