“WOWOWILLIE” misuporta sa team Rama

CEBU, Philippines - Mibisita sa Sugbo ang pinangga sa masa nga TV host Willie Revillame Sabado sa gabii diin ang mitambong miabot sa 90 mil ngadto sa 100,000.

Usa ka kombinasyon sa political rally ug ang pagpanghatag og papremyo ni Revillame, ang “Wowowillie in Cebu Supports Team Rama” gipahigayon sa Plaza Independencia diin sagad sa mga nanan-aw naghuwat buntag pa.

Si Waterfront Police Station chief Wildemar Tiu mibana-bana sa mga mitambong nga 80,000-90,000.

“Nakita man ninyo unsa ka siksik ang area. So far, sa mga na-handle nako nga sa activities, pinakagrabe gyud ni siya tungod sa kadaghan sa senior citizens and disabled nga pulos nag-expect nga mahatagan ni Willie og kwarta,” matud ni Tiu.

Si Cebu City Mayor Michael Rama mihatag sa iyang kaugalingong bana-bana nga 100,000. Apan ang kaatbang ni Rama sa politika, nga si Cebu City South District Congressman Tomas Osmeña kinsa pangulo usab sa Bando Osmeña Pundok Kauswagan (BOPK), dili motoo sa gidaghanon sa mitambong sa programa.

“The crowd was only 50 meters deep. Now crowd was seen marching from Banilad, in Bacalso, in Colon, in North Reclamation, from the south, from Talamban,” matud pang Osmeña nga daw di kadawat sa gidaghanon sa mga mitambong sa Team Rama.

 â€œWhere did the 100 thousand come from? Bohol? Not a single traffic jam. As usual team likes to add one zero to their estimates. 3,000 becomes 30,000. But last night it was more like 6,000,” dugang ni Osmeña.

Si Revillame mideklarar nga mobalik siya kung makadaug sa piniliay ang Team Rama. “Suportahan nyo po sila Annabelle (Rama) and Mayor Mike (Rama) at pinapangako ko sa inyo na babalik ako sa Cebu para mag show ulit upang makapagbigay ng mga papremyo.”

Nanghatag og jacket, cellphone units, ug kwarta ngadto sa mga senior citizen ug persons with disability si Willie.

“Galing po ito sa akin, hindi kina Annabelle at Mayor Mike,” giklaro ni Revillame. Ang COMELEC nagdili sa pagpanghatag og donasyon pinaagi sa kwarta or butang sugod niadtong Pebrero 12 hangtud na sa eleksyon sa Mayo 13 gikan sa mga kandidato.

Nasayran sa The Freeman Entertainment gikan sa TV5-Manila corporate communciations department, nga ang maong programa walay kalabutan sa TV5 diin gi-air ang programang Wowowillie sa Wil Productions.

Kini gikumpirmar ni TV5 Cebu station manager Karla Kinatanar Fernandez.

“That’s solely a Wil Productions project. We knew of the show as Mr.Revillame has been announcing it in his show. They are mounting it themselves without TV5 cameras, etc,” matud pa ni Fernandez sa text message, ug midugang sa pag-ingon “no big issue really.”

Nasigpatan usab sa maong kalihukan si kanhi Cebu City Mayor ug KUSUG party chairman emeritus Alvin Garcia sa dayon ng pagkahuman kansang partido miendorsar sa pipila ka kandidato sa Team Rama. (BANAT NEWS)