CEBU, Philippines - Usa ka gipasanginlang bigtime nga financier sa masiao sa amihanang bahin Sugbo ug mga coordinators niini ang nasikop sa mga sakop sa Provincial Intelligence Branch sa Cebu Provincial Police Office.
Ang nasikop mao si Necesito Melendres alyas Nesing nga giingong financier sa maong ilegal nga sugal. Nasikop usab ang iyang mga coordinator nga silang Edwin Amores, Feliver Lubon nga puros taga dakbayan sa Bogo ug Bernardo Dotosme nga molupyo sa lungsod sa Tabogon. Sa pakighinabi sa Banat News ni SPO1 Francis Allen Villamor, ang team leader sa maong operasyon nga si Nesing ug mga sakop anaa sa ilang top 3 watchlist nga mga financier sa sugal nga anaa sa ilang listahan.
Matud pa ni Villamor dugay nilang gi- surveillance ang grupo ni Melendres diin ilang nasuta nga aduna silay tulo ka panimalay nga gipundohan gikan sa lungsod sa San Remegio, dakbayan sa Bogo ug sa barangay Hipodromo sa dakbayan sa Sugbo.
Matud pa ni Villamor sa uwahi nilang pagpaniid didto na magpundohan kanunay sa Bogo si Melendres hinungdan sa gipahigayon nilang operasyon.
Ang tulo ka coordinators nataymingan nga diha usab sa panimalay ni Nesing nag-remit sa ilang kita hinungdan sa ilang pagkasikop.
Si Melendres giingong diha mag-operate sa Northern Cebu ug mokita kini og P100 mil kada adlaw gikan sa mga pusta base sa intelligence report sa kapolisan.
“Naa sila’y paagi nga sugat-sugat lang sila, dili na ang coordinator maoy molahos gyud,†matud pa ni Villamor.
Atol sa operasyon nakuha gikan sa upat ang nagkadaiyang paraphernalia sa illegal nga sugal nga masiao ug kwarta nga gituohang halin nga nagkantidad og kapin sa P6 mil ug motorsiklo nga XRM nga adunay plakang OF6981 ug usa ka Mitsubishi Adventure nga adunay plakang YEC 771. (BANAT NEWS)