CEBU, Philippines - Gisukit ni Department of Social Welfare and Development (DSWD) Secretary Corazon Juliano Soliman ang mga delegado sa Association on Southeast Asian Nations (ASEAN) kun gituman ba nila ang ilang saad pagsulbad sa isyu bahin sa Cyber Pornography ug Cyber Prostitution-Free Southeast Asia atol sa bag-ohay pang gibuksan ika- duhang ASEAN Conference nga gipahigayon didto sa syudad sa Tagbilaran.
Sa iyang pamahayag gibatbat ni Soliman nga mas dungganan ang mga kabus nga magpabiling kabus ubos sa dungganong panginabuhi kay sa makuwartahan apan maguba ang dungog.
Matud pa ni Soliman nga komon na kaayong makita kining problemaha sa mga babaye nga gumikan sa pangandoy nga moharuhay ang kinabuhi dali kaayong madani sa mga tawo nga motanyag kunohay kanila og maayong trabaho apan sa kaulahian dad-on sila ngadto sa trabaho nga makagusbat sa ilang moral. Busa giawhag ni Soliman ang mga kadagkoan sa ASEAN nga mopitol sa ilang mga taginasud nga mosud sa mga pundok nga manglingla og kababayen-an gikan sa ubang mga nasud sama sa Pilipinas nga sakop ra usab sa ASEAN.
Gipadayag ni Soliman nga dako usab kaayo og natampo ang mga modernong kahimanan sa komunikasyon sama sa internet diin ang mga manlilinlang nga mga tawong langyaw dali ug sayon nga makadani og biktimahonon gumikan sa mga madanihon kaayo nilang tanyag sa trabaho pinaagi sa maong kahimanan. Apan mao gihapon kutob sa matintal mosangpot ra gihapon sa pagkamakaluluoy, sumala ni Soliman.
Samtang si Jaybee Binghay, tigpamaba sa DSWD 7 miingon nga gumikan sa maong awhag ni Kalihim Soliman nagkauyon ang mga representante sa ASEAN nga pahugtan ang ilang kooperasyon ug ipatumang higpit ang balaod nga mosilot sa kaugalingon nilang tagi-nasud nga maoy instrumento sa pagpanglingla og mga kababayen-an nga mabanlod sa dautang matang panginabuhi ug makaguba dili lamang sa ilang kaugalingong dungog apan labaw sa ilang nasud. (BANAT NEWS)