Naghikog habol ang gigamit

CEBU, Philippines - Tungod  sa problema  sa kuwarta, usa  ka  ulitawo  naghikog  pinaagi  sa habol nga gigamit  niini  sa pagbitay  sulod  sa ilang  balay  sa  sitio Datag,  barangay Maribago dakbayan sa Lapu-lapu  sa miaging gabii.

Ang nagtubok  mao  si Marlon Canada, 33,  usa  ka  construction worker ug lumolupyo sa maong dapit.

Si  Canada  kinsa  may  kapuyo, wala nay  kinabuhi  nga  nadiskobrehan ni Maribel  nga  iyang  ka-live-in   nga nagbitay sulod  sa ilang  lawak.

Matud ni PO2 John Carlo Jocutan sa Lapulapu  City  Police  Station nga sayo  niini  si Canada ug ang  iyang  kapuyo nagkalalis  bahin  sa  kaapiki  sa kuwarta.

Gumikan  niini, wala na  magdug  sa ilang  katre  ang  magkapuyo human  sa ilang  panihapon kay  si  Maribel  didto  matulog  sa pikas  lawak.

Apan  gumikan sa sugo  sa lawas  mibangon  si Maribel   dihang  paglabay  niya  sa pikas  lawas  nagbitay  na  si Canada.

Nangayo  dayon  siya  og  panabang  sa  ilang  mga  silingan  ug  nasuta  nila  nga  patay  na  kini  tungod  sa kahugot  sa tumoy  sa habol  nga  gibalighot  sa  iyang  liog  kansang  pikas  tumoy  gigaid  sa sagbayan  sa ilang  balay.

Ila  kining gihatod  ngadto  sa Lapulapu City District Hospital diin  didto gideklarar  sa  doktor  nga  patay  na  kini.

Dugang pa ni PO2 Jocotan nga magpadayon pa ang ilang  imbestigasyon ug ilang gisugyot ngadto sa pamilya sa namatay sa pagpaubos sa autopsy sa patay’ng lawas niini aron  pagsuta kun wala  bay  foul play  ang kamatayon niini. (BANAT NEWS)