CEBU, Philippines - Patay nang napalgan sa anak ang iyang amahan kinsa masakiton og nerbyos human kini maghikog sulod sa kwarto niini didto sa Sityo Daro, barangay Poblacion sa lungsod sa miaging buntag.
Ang nagpakamatay mao si Lyndon Duazo, 46 , minyo, ug nagpuyo sa maong lugar ug ang nakadiskobre sa iyang kamatayon mao ang iyang anak nga si Lordy Duazo.
Si PO2 Gilbert Encabo sa Barili Police Station mibutyag sa Banat News nga gihatdan ni Lordy og pagkaon ang iyang amahan sa maong higayon dihang nakurat siya sa iyang nakita nga nagbitay na sa pisi ang iyang papa.
Patay na kini tungod sa kalig-on sa pisi nga nylon nga gihikot sa iyang liog kansang pikas tumoy gigaid usab sa sagbayan sa ilang balay. Apan ila gyud kining gihatud ngadto sa Barili District Hospital diin kini ideklarar nga dead on arrival (DOA).
Sumala sa mga kabanay ni Duazo nga dugay na kining nag-antos sa sakit nga nervous breakdown ug kanunay nga mahadlok sa mga tawong gustong mopatay kaniya.
Ang iyang mga kabanay kombinsido nga walay foul play ang maong hitabo ug paghikog gyud ang namatyan niini. (/WC) (FREEMAN)