CEBU, Philippines - Gusto ni Mayor Michael Rama nga ipatawag sa Office of the Ombudsman-Visayas ang kapitan sa Barangay Pahina San Nicolas Proper aron ipamatuod kaniya nga si Kongresista Tomas Osmeña mihatag og donasyon alang sa Kaplag Buwad Festival.
Ang balaud nagdili na karon sa mga kandidato nga mohatag og mga donasyon, ma-kwarta man o butang, tungod kay ang paghimo niini maisip na nga “vote buying.â€
Atol sa press conference kaniadtong Miyerkules gitug-an ni Kapitan Abraham “Boy†Desamparado nga si Kongresista Tomas Osmeña mihatag og kwarta isip donasyon aron gamiton sa pagpahigayon sa Kaplag Buwad Festival karong Sabado.
Si Desamparado miangkon nga siya ug ang ubang opisyal sa barangay mga alyado sa Bando Osmeña Pundok-Kauswagan (BOPK) mao nga didto ra sila nangayo’g tabang ni Osmeña ug wala sila misuway pagpangayo sa kaatbang niini nga kandidato sa Team Rama.
Matud ni Mayor Rama nga kinahanglang molihok na ang Ombudsman aron masilotan kadtong mga masalaypon sa balaud sa eleksyon.
Apan si Temie Lambino nga maoy regional director sa Commission on Elections (Comelec) sa Central Visayas miingon nga kung base lang sa pangangkon ni Desamparado nga mihatag kanila og donasyon si Osmeña, dili pa kini igo nga ebidensya.
Gipasabot ni Lambino nga kinahanglang aduna g’yuy tawo nga mopirma og pinanumpaang-pamahayag aron nga imatuod nga tinuod gyud nga ang usa ka politiko nakahimo og kalapasan sa balaud.
Si Osmeña nanghimakak na sa gibutyag ni Desamparado bahin sa donasyon aron gamiton sa pagpahigayon sa Kaplag Buwad Festival.
Si Desamparado miingon nga gibana-bana nila nga ang Buwad Festival magkinahanglan og P585,000 ug maoy rason nga nangayo sila’g tabang sa City Hall apan ang maong budget wala aprobahi sa Konseho.
Matud ni Osmeña nga imposible nga mohatag siya og donasyon ngadto sa maong kalihukan niining panahona nga gidili na sa balaud.
Gipasabot sa kongresista nga gitabangan ra niya si Desamparado pinaagi sa pagpaila-ila ngadto sa tagdumala sa usa ka “distributor†og “bottled water†ug tingali giisip na kini sa kapitan nga siya maoy mitabang. (/EIM) (BANAT NEWS)