Nagsakay’g motor ulo nabunal patay

CEBU, Philippines - Patay ang usa ka lalaki human kini mabunal sa karsada dihang ang motorsiklong iyang gimaneho natumba niadtong Lunes sa hapon diha sa sitio Kamanggahan, South Ville Subdivision, barangay Tabunok, dakbayan sa Talisay.

Ang biktima giila nga si Crisaldo Laborada Gabonada, taga Cabancalan I, barangay Bulacao, dakbayan sa Sugbo.

Si PO1 Rosauros Pasumala nga nahinabi sa Banat News kagahapon nagkanayon kini nga base sa imbestigasyon ni SPO2 Elmer Saladas si Gabonada nagbiyahe kini sakay sa iyang Honda nga motorsiklo nga nagtangag sa plakang 4703-TK gikan sa barangay Bulacao paingon ngadto sa sitio Dawis, barangay Tabunok.

Apan pag-abot sa lugar nga nahitabo natumba ang motorsiklo hinungdan sa pagkabunal ni Gabonada diha sa karsada.

Si Gabonada kinsa nakaangkon og grabeng kadaot sa lawas ug ulo daling gidala ngadto sa Talisay City District Hospital apan wala na kini makaabot nga buhi sa maong tambalanan.

Base sa blotter sa traffic division walay nakatala kung si Gabonada nagsul-ob ba kini og helmet. (BANAT NEWS)