CEBU, Philippines - Namatay ang usa ka security guard human kini pusila samtang nagsakay sa iyang motorsiklo didto sa sitio Guinharapan, Barangay Bagay, lungsod sa Daanbantayan, kagahapon sa kaadlawon.
Ang biktima mao si Ronel Lagaras Dosdos, 25, ulitawo, nga nagpuyo sa Sitio Combado, Barangay Bagay sa maong lungsod.
Samtang ang mga suspetsado nailhan usab nga sila si Rodel Pega ug Jobert Pega, pulos hingkod nga nagpuyo sa barangay Dalingding Sur, lungsod sa Medillin.
Sa pasiunang imbestigasyon sa kapolisan nasuta nga ang biktima padulong na sa ilang balay sakay sa iyang motorsiklo angkas ang iyang pag-umangkon ug silingan nga mga menor de edad.
Apan pag-abot nila sa dapit nga nahitaboan, kalit lang silang gi-overtikan sa usa ka pulang motorsiklo nga walay plate number nga kusog kaayong nagdagan
Sa pag-abot sa unahan nanaog ang usa sa nagsakay niini ug gipusil ang biktima maka-upat ka higayon ug nasabak siya sa dughan ug tiyan.
Gihatud dayon sa mga kabanay ang biktima ngadto sa Daanbantayan Hospital diin kini ideklarar nga patay na.
Si SPO3 Alfredo Mandal misaysay nga si Joebert Pega ug ang biktima nagkabangi sa personal nga rason dili pa dugay.
Si Jobert nadakpan dayon sa kapolisan human sa pagpamusil samtang si Rodel Pega nakaikyas ug gipangita na kini sa kapolisan.
Kasong murder ang gipasaka sa pamilya sa biktima batok sa mga suspetsado. (BANAT NEWS)