Kahera gitulis P6 mil nasakiyo

CEBU, Philippines - Mikabat  sa P6 mil  ang  nasakiyo  sa usa ka tulisan nga mitulis  sa kahera sa usa ka tindahan  didto  sa barangay Cabancalan, dakbayan sa Mandaue, sa miaging  kaadlawon.

Ang biktima mao si Marlee Coca Pacquiao, 19,  lumad   nga  taga barangay Tag-amacan, lungsod sa Asturias ug nagtrabaho isip cashier sa   usa  ka convenient store nga bukas 24 oras  sa maong  lugar.

Si PO1 Anthony Mendoza sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan mibutyag  sa Banat News   nga samtang  naglingkod siya  sa  atubangan  sa  cash machine  kalit  lang  miabot  ang  usa   ka itom  nga motorsiklo  nga  walay  plate  number  nga  gisakyan  og  duha    ka   lalaki.

Dayon  ang   angkas niini sa likod  maoy nanaug ug nag-inusara  kining misulod sa tindahan  nga nagpakaaron-ingnon  nga customer.

Matud pa ni PO1 Mendoza nga miduol kini sa kahera nga wala  makabantay, ug mition sa   iyang armas nga wala pa matino ang   kalibre  dayong deklarar nga tulis.

Ang biktima nga   nalisang  nga pusilon  wala makalihok sa gilingkoran ug  igo na lamang niining gitan-aw ang tulisan nga mihakop sa kuwarta nga kapin sa P6,000 nga  halin  sa tibuok  gabii.

Gawas sa cash, gidala usab ang upat ka mga cell phone nga gigamit   nga  gibutang  duol  sa cash  machine. Si PO1 Mendoza miingon nga walay guwardiya nga nagbantay sa maong tindahan dihang nahitabo ang maong tulis apan aduna kini  CCTV camera nga dako kaayo og ikatabang kanila  sa pag-ila sa tulis.

Padayon  pa  karon  ang  imbistigasyon  nga  gihimo  sa kapolisan. (BANAT NEWS)