Mangunguot gikan CDO nia sa Sugbu–CCPO
CEBU, Philippines - Mipahimangno ang kapolisan sa Cebu City Police Office, Theft and Robbery Section nga adunay grupo sa mga kawatan gikan sa Cagayan de Oro City ang nangabot karon dinhi sa Sugbu.
Usa kanila ang nadakpan nga giilang si Ferdinand Santos Santiago, 39, lumad nga taga Cagayan de Oro ug kasamtangang nagpuyo sa A. Lopez, Labangon ning dakbayan.
Alas-4 sa hapon niadtong milabay’ng hapon nasikop si Santiago sud sa usa ka dakong uptown mall human gireklamo sa usa ka Overseas Filipino Worker nga si Rhea Joy Rojas, 28, nagpuyo sa Jagobiao, Mandaue City kinsa nabiktima sa pagpanguot.
Matud pa nga samtang namili si Rojas og paliton dunay tulo ka lalaking mibangga kaniya, paglabay og pipila ka minutos abli na iyang bag.
Wala na diha ang iyang cash nga P50,000 ug 300 Singaporean dollars hinungdan sa iyang pagtan-aw sa CCTV sa establisamento. Apan ang suspetsado miingon nga igo ra siyang modumog sa target ug ang iyang kuyog gyud maoy mokuot.
Si Snr. Insp. William Alicaba miingon nga si Ferdinand nadakpan na niadtong Biyernes ug ilang gi-turnover ngadto sa Mabolo Police Station apan gibuhian kay walay reklamo nga gisang-at batok kaniya. (BANAT NEWS)
- Latest
